काठमाडौं । श्रम संस्कृति पार्टीका अध्यक्ष तथा प्रतिनिधिसभा सदस्य हर्क साम्पाङले सडक दुर्घटनाकालागि चालकको व्यवहार मात्र जिम्मेवार नहुने भन्दै सडक पूर्वाधारको कमजोर अवस्था र खाल्डाखुल्डीलाई प्रमुख कारणका रूपमा औंल्याएका छन्।
सोमबार सिंहदरबार परिसरमा सञ्चारकर्मीसँग कुरा गर्दै उनले हालै आफूलाई लक्षित गरेर उठाइएका ट्राफिक नियम उल्लंघनसम्बन्धी प्रश्न र सामाजिक सञ्जालमा भएका टिप्पणीबारे प्रतिक्रिया दिएका हुन्।
केही दिनअघि सार्वजनिक भएको एक भिडियोमा साम्पाङ मोटरसाइकल एक हातले चलाइरहेको देखिएपछि ट्राफिक प्रहरीले उनीमाथि कारबाही प्रक्रिया अघि बढाएको थियो। सोही प्रसंगमा उनले दुर्घटनाको वास्तविक कारणबारे बहस हुनुपर्ने धारणा राखे।
‘सडक दुर्घटना केवल एक हातले मोटरसाइकल चलाएकै कारण हुँदैन। सडकमा भएका खाल्डाखुल्डी, अव्यवस्थित संरचना र कमजोर पूर्वाधारले धेरै दुर्घटना निम्त्याइरहेका छन्,’ उनले भने।
साम्पाङले ट्राफिक नियममा एक हातले सवारी चलाउनुलाई स्पष्ट रूपमा कसुरका रूपमा उल्लेख गरिएको छ वा छैन भन्ने विषयमा पनि प्रश्न उठाए। हेलमेटको फित्ता नलगाएको भन्ने आलोचनाबारे बोल्दै उनले आफ्नो हेलमेट पुरानो भएकाले फित्ता खुकुलो देखिएको दाबी गरे।
कुराकानीका क्रममा उनले विद्यार्थीहरूका मोबाइल फोन नियन्त्रणमा लिएर नष्ट गरिएको भनिएको घटनाप्रति पनि टिप्पणी गरे। आधुनिक जीवनमा मोबाइल अत्यन्त महत्त्वपूर्ण साधन बनिसकेको उल्लेख गर्दै उनले कुनै पनि व्यक्तिको निजी सम्पत्ति नष्ट गर्नु उचित नहुने धारणा राखे।
‘मोबाइल आजको समयको आवश्यक उपकरण हो। कुनै पनि बहानामा त्यस्तो सामग्री नष्ट गर्नु सही अभ्यास होइन,’ उनले भने।
सामाजिक सञ्जालमा आफ्ना गतिविधि र अभिव्यक्तिहरू निरन्तर चर्चामा रहने गरेको उल्लेख गर्दै साम्पाङले आफू श्रम, उत्पादन र संस्कृतिको पक्षमा निरन्तर आवाज उठाइरहने बताए।
प्रकाशित मिति: २५ जेष्ठ २०८३, सोमबार
प्रतिक्रिया