काठमाडौं। नेपाल वायुसेवा निगम (नेपाल एयरलाइन्स) का दुई करार कर्मचारी पक्राउ परेका छन् ।
काठमाडौं उपत्यका अपराध अनुसन्धान कार्यालयले आइतबार सुमित्रा चन्द र प्रवीण लामिछानेलाई नियन्त्रणमा लिएको हो । उनीहरू ग्राउन्ड ह्यान्डलिङ स्टाफका रूपमा कार्यरत थिए ।
प्रहरीका अनुसार एक भारतीय नागरिक भारत जानका लागि अध्यागमन जाँचपास भएर वेटिङ रुममा पुगेका थिए ।
त्यहाँ नेपाल एयरलाइन्सकी कर्मचारी चन्दले उनलाई फ्लाई दुबईको बोर्डिङ पास दिइन् । जेठ ३ गते उक्त भारतीय नागरिक दुबई उडेका थिए ।
भारतीय नागरिकले तेस्रो मुलुक जानका लागि नो अब्जेक्शन सर्टिफिकेट (एनओसी) पेस गर्नुपर्ने व्यवस्था छ ।
तर, उक्त प्रक्रिया पूरा नगरी बोर्डिङ पास दिइएको भन्दै अध्यागमन विभागले प्रहरीलाई पत्राचार गरेको थियो ।
त्यसपछि प्रहरीले उनीहरूलाई पक्राउ गरी अनुसन्धान अघि बढाएको छ ।
प्रकाशित मिति: २५ जेष्ठ २०८३, सोमबार
प्रतिक्रिया