काठमाडौं । राहदानी छपाइसँग सम्बन्धित भ्रष्टाचारको आशंकामा अनुसन्धान गरिरहेका दुई उच्च सरकारी अधिकारीलाई विशेष अदालतले चार दिन हिरासतमा राख्न अनुमति दिएको छ।
विशेष अदालतका अध्यक्ष सुदर्शनदेव भट्ट तथा सदस्यहरू उमेश कोइराला र विदुर कोइरालाको संयुक्त इजलासले राहदानी विभागका महानिर्देशक तीर्थराज अर्याल र निर्देशक सुनीलकुमार केसीलाई अनुसन्धानका लागि चार दिन थुनामा राख्न स्वीकृति दिएको हो।
अख्तियार दुरुपयोग अनुसन्धान आयोगले उनीहरूलाई २० दिन हिरासतमा राखेर अनुसन्धान गर्न अनुमति मागेको थियो। तर अदालतले सोमबारदेखि लागू हुने गरी प्रारम्भिक रूपमा चार दिनको म्याद दिएको विशेष अदालतका प्रवक्ता कृष्णशरण लामिछानेले जानकारी दिए।
प्रवक्ता लामिछानेका अनुसार राहदानी छपाइ प्रक्रियासँग सम्बन्धित कथित भ्रष्टाचारजन्य कसुरबारे थप अनुसन्धान गर्न उक्त अनुमति प्रदान गरिएको हो।
अख्तियारले घटनासम्बन्धी प्रमाण संकलन, कागजात अध्ययन तथा सम्बन्धित पक्षसँग सोधपुछका लागि हिरासत अवधि आवश्यक रहेको जनाएको छ। प्रकरणबारे थप अनुसन्धान जारी रहेको बताइएको छ।
प्रकाशित मिति: २ असार २०८३, मंगलबार
प्रतिक्रिया