काठमाडौं । प्रतिनिधिसभा सदस्य ऐन महरले भौतिक पूर्वाधार तथा यातायात मन्त्री सुनिल लम्साललेसार्वजनिक रूपमा दिएको ‘ठेकेदारको खुट्टा भाँच्ने’ अभिव्यक्तिबारे संसदमा प्रश्न उठाएका छन्।
प्रतिनिधिसभाको बैठकमा बोल्दै महरले मन्त्रीको उक्त अभिव्यक्ति कानुनी तथा नैतिक दृष्टिले उपयुक्त थियो वा थिएन भन्ने विषयमा सरकारको धारणा स्पष्ट हुनुपर्ने बताए। उनले व्यंग्यात्मक शैलीमा टिप्पणी गर्दै मन्त्रीको भनाइलाई लिएर स्पष्टता माग गरे।
महरले मन्त्री पदमा रहेका व्यक्तिले सार्वजनिक रूपमा प्रयोग गर्ने भाषाले कानुनी शासन र प्रशासनिक संस्कृतिमा प्रभाव पार्ने भएकाले यस्ता अभिव्यक्तिबारे स्पष्ट जवाफ आवश्यक रहेको बताए।
जवाफमा भौतिक पूर्वाधार तथा यातायात मन्त्री लम्सालले आफ्नो अभिव्यक्तिलाई शाब्दिक अर्थमा नबुझ्न आग्रह गर्दै कसैलाई शारीरिक हानि पुर्याउने उद्देश्य नभएको स्पष्ट पारे। उनले विकास निर्माणका आयोजना वर्षौँसम्म अलपत्र पार्ने ठेकेदारहरूलाई जिम्मेवार बनाउन कडा शब्द प्रयोग गरिएको बताए।
‘मेरो उद्देश्य कसैलाई शारीरिक क्षति पुर्याउने होइन, निर्माण कार्य समयमै सम्पन्न होस् भन्ने मात्रै हो,’ मन्त्री लम्सालले भने, ‘ठेकेदारले सम्झौताअनुसार काम नगरे कानुनबमोजिम ठेक्का रद्द हुन सक्छ, बैंक ग्यारेन्टी जफत हुन सक्छ र त्यसले उनीहरूको व्यवसायमा गम्भीर असर पर्न सक्छ।’
उनले निर्माण कम्पनीहरूले समयमै काम सम्पन्न नगर्दा सरकार, स्थानीय समुदाय र विकास आयोजनाहरू सबै प्रभावित हुने भएकाले जिम्मेवारीबोध गराउन कडा अभिव्यक्ति प्रयोग गरिएको बताए।
मन्त्री लम्सालले सरकारको प्राथमिकता निर्माण व्यवसायीलाई दण्डित गर्नु नभई विकास निर्माणका कामलाई निर्धारित समयमै सम्पन्न गराउनु रहेको उल्लेख गरे। ‘हामी कसैसँग द्वन्द्व चाहँदैनौँ,’ उनले भने, ‘सम्झौताअनुसार काम सम्पन्न भए सरकार पनि सन्तुष्ट हुन्छ र नागरिकले पनि समयमै सेवा पाउँछन्।’
संसदमा उठेको यो विषयले सार्वजनिक पदाधिकारीहरूको अभिव्यक्ति, कानुनी मर्यादा र विकास निर्माणमा देखिएको ढिलासुस्तीबारे थप बहसको वातावरण सिर्जना गरेको छ।
प्रकाशित मिति: ४ असार २०८३, बिहिबार
प्रतिक्रिया