काठमाडौं । नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले वर्तमान सरकार गरिब, किसान र मजदुरविरोधी रहेको आरोप लगाएका छन्।
शुक्रबार पार्टीको सदस्यता नवीकरण तथा वितरण अभियानको उद्घाटन कार्यक्रममा बोल्दै उनले सरकारका नीति, कार्यक्रम, बजेट र निर्णयहरू समग्र रूपमा श्रमिक तथा निम्न आय वर्गको हितविपरीत रहेको टिप्पणी गरे।
प्रचण्डका अनुसार सरकारले समाजका उत्पीडित वर्गको प्रतिनिधित्व गर्न नसकेको र बरु उच्च वर्गको स्वार्थ संरक्षणमा केन्द्रित भएको देखिएको छ। उनले श्रमिक, किसान तथा मजदुरका अधिकारमाथि भइरहेको असरप्रति गम्भीर हुनुपर्ने आवश्यकता औंल्याए।
उनले ट्रेड युनियनलगायत श्रमिक अधिकारसँग सम्बन्धित संस्थामाथि भइरहेका गतिविधिप्रति पनि असन्तुष्टि जनाउँदै त्यसविरुद्ध सबै लोकतान्त्रिक माध्यमबाट आवाज उठाउनुपर्ने बताए।
प्रचण्डले सडकदेखि संसद्सम्म प्रतिपक्षी शक्तिहरूलाई एकताबद्ध गर्दै सरकारका नीतिविरुद्ध सशक्त भूमिका निर्वाह गर्नुपर्ने धारणा राखे। उनका अनुसार गणतन्त्रवादी तथा वामपन्थी शक्तिहरूबीच सहकार्य आवश्यक छ।
उनले आगामी महाधिवेशनसम्म राजनीतिक वातावरण अझ स्पष्ट हुने विश्वास व्यक्त गर्दै विभिन्न राजनीतिक दलहरूसँग निरन्तर छलफल भइरहेको जानकारी दिए। साथै, सत्तारुढ दलका नेताहरूसँग समेत संवाद जारी रहेको उल्लेख गर्दै कमजोरी सुधार गरेर अघि बढ्न सकिने उनको भनाइ थियो।
प्रकाशित मिति: ५ असार २०८३, शुक्रबार
प्रतिक्रिया