काठमाडौं । राष्ट्रिय स्वतन्त्र पार्टी (रास्वपा) ले आफ्नो साधारण सदस्य संख्या पाँच लाख नाघेको जनाएको छ।
चितवनमा आइतबारदेखि सुरु हुने पहिलो राष्ट्रिय महाधिवेशनको पूर्वसन्ध्यामा आयोजित केन्द्रीय समिति बैठकपछि प्रवक्ता मनिष झाले सो जानकारी दिएका हुन्।
उनका अनुसार पार्टीको संगठन विभाग र महामन्त्रीबाट प्राप्त विवरणअनुसार हालसम्म सदस्य संख्या पाँच लाखभन्दा बढी पुगेको छ। पार्टी विस्तार देशभर तीव्र गतिमा भइरहेको र ४ हजार ६३ वडामा वडा अधिवेशन सम्पन्न भइसकेको पनि उनले बताए।
ती वडाबाट छनोट भएका प्रतिनिधिहरू जिल्ला, प्रदेश हुँदै केन्द्रीय महाधिवेशनमा सहभागी भएका छन्।
रास्वपाले पहिलो महाधिवेशनमार्फत संगठनलाई थप सुदृढ बनाउने र आगामी राजनीतिक तथा संगठनात्मक कार्यदिशा तय गर्ने तयारी गरेको छ।
प्रकाशित मिति: ६ असार २०८३, शनिबार
प्रतिक्रिया