रास्वपा महाधिवेशन: ४१ सय प्रतिनिधिका लागि दैनिक ८ क्विन्टल खसीको मासु

चितवन । राष्ट्रिय स्वतन्त्र पार्टी (रास्वपा) को पहिलो ऐतिहासिक महाधिवेशनको सांगठनिक तथा नीतिगत बहस आजदेखि सुरु हुँदैछ। आइतबार भव्य उद्घाटन भएको महाधिवेशनको महत्त्वपूर्ण ‘बन्दसत्र’ आज सोमबारदेखि चितवन उद्योग संघको प्रदर्शनी केन्द्रमा सुरु हुन लागेको हो।

बन्दसत्रमा भाग लिन देशभरका विभिन्न जिल्ला, प्रवास तथा विभिन्न तहका कमिटीहरूबाट चुनिएका झण्डै ४,१०० प्रतिनिधिहरू चितवन आइपुगेका छन्।

महाधिवेशनमा सहभागी प्रतिनिधि र अन्य पाहुनाहरू गरी दैनिक झण्डै ५,००० मानिसका लागि महाधिवेशन स्थलमै ताजा खाना पकाएर खुवाउने व्यवस्था गरिएको छ। चितवनको इतिहासमै यति ठुलो संख्याका लागि कार्यक्रम स्थलमै ‘लाइभ’ खाना पकाएर खुवाउन लागिएको यो पहिलो पटक भएको दाबी गरिएको छ।

खाना व्यवस्थापनको सम्पूर्ण जिम्मेवारी नारायणगढको प्रख्यात दियालो फुडल्याण्डले लिएको छ। गर्मी मौसमलाई ध्यानमा राख्दै खानाको गुणस्तर र सरसफाइमा उच्च सावधानी अपनाइएको छ, जसका लागि दियालोका मात्रै झण्डै २०० कर्मचारी र कामदार चौबीसै घण्टा खटिएका छन्।

मेनुमा के-के छ? 
महाधिवेशन प्रतिनिधिका लागि बिहान र बेलुकाको खानामा कम्तीमा १० वटा परिकार (आइटम) समावेश गरिएको छ।

बिहानको खाना जिरा राइस, दाल, तरकारी, अचार, सलाद, दही र विशेष परिकारका रूपमा खसीको मासु रहनेछ। ४१ सय प्रतिनिधिका लागि मात्रै दैनिक झण्डै ८ क्विन्टल खसीको मासुको व्यवस्था गरिएको छ।

बेलुकाको खानालाई हल्का र स्वस्थ बनाउन ‘मिक्स भेज’ तरकारी र अन्य शाकाहारी परिकारहरू राखिनेछ। मासु नखाने प्रतिनिधिहरूका लागि पनिर, च्याउ र सिजनल (मौसमी) तरकारीको छुट्टै विशेष व्यवस्था गरिएको छ।

महाधिवेशन अवधिभर प्रतिनिधिहरू भोकै बस्न नपरोस् भनी बिहानदेखि बेलुकासम्म ४ पटक खानपानको तालिका मिलाइएको छ।

बिहान ७:०० बजेदेखि: ब्रेकफास्ट (खाजा)
दिउँसो १:०० देखि २:३० बजेसम्म: बिहानको खाना (लन्च)
दिउँसो ३:०० देखि ५:०० बजेसम्म: हाइटी (खाजा र चिया)
बेलुका ६:०० देखि ९:०० बजेसम्म: बेलुकाको खाना (डिनर)

भीडभाड नहोस् भन्नका लागि भोजन स्थलमा दुवैतर्फबाट खाना लिन मिल्ने गरी १५ वटा टेवल स्टलहरू राखिएका छन् भने प्रतिनिधिहरूलाई खानाका लागि कुपन अनिवार्य गरिएको छ।

महाधिवेशनमा सहभागी हुन आएका प्रतिनिधिहरूबाट रास्वपाले जनही ५,००० रुपैयाँ अधिवेशन शुल्क उठाएको छ। सोही शुल्कबाट प्रतिनिधिहरूको ३ दिनको सम्पूर्ण गाँस (खाना र खाजा) को व्यवस्थापन पार्टीले गरेको हो। यद्यपि, होटल र बासस्थानको समन्वय पार्टीले गरिदिए पनि बस्ने खर्च (होटलको बिल) भने प्रतिनिधिहरू आफैंले भुक्तानी गर्नुपर्ने नियम बनाइएको छ।

सबै प्रतिनिधिहरू हिजो नै चितवन आइसकेका कारण आज बिहान ७ बजेको ब्रेकफास्टसँगै बन्दसत्रको माहोल निकै अनुशासित र व्यवस्थित रूपमा अगाडि बढेको देखिन्छ।

प्रकाशित मिति: ८ असार २०८३, सोमबार