चितवन । प्रधानमन्त्री बालेन्द्र (बालेन) शाह सोमबार परिवारसहित पर्यटकीय गन्तव्य सौराहा पुगेका छन्। राष्ट्रिय स्वतन्त्र पार्टी (रास्वपा) को महाधिवेशनमा सहभागी हुन चितवन आएका प्रधानमन्त्री शाहले राजनीतिक कार्यक्रमसँगै पारिवारिक भ्रमणलाई पनि प्राथमिकता दिएका हुन्।
सौराहा भ्रमणका क्रममा उनले चितवन राष्ट्रिय निकुञ्ज अन्तर्गत सञ्चालित हात्ती प्रजनन केन्द्रको अवलोकन गरेका छन्। अवलोकनका बेला उनले हात्ती संरक्षण, प्रजनन कार्यक्रम, व्यवस्थापन प्रणाली तथा पर्यापर्यटन प्रवर्द्धनमा केन्द्रको भूमिकाबारे जानकारी लिएको बताइएको छ।
परिवारसहित प्राकृतिक वातावरणमा रमाएका प्रधानमन्त्री शाहले सौराहाको जैविक विविधता, वन्यजन्तु संरक्षण र प्राकृतिक सम्पदाप्रति विशेष चासो देखाएका थिए। भ्रमणका क्रममा उनी उत्साहित र सहज मुद्रामा देखिएका थिए।
स्थानीय पर्यटन व्यवसायीहरूका अनुसार प्रधानमन्त्रीले सौराहाको पर्यटन विकास, संरक्षणका चुनौती तथा सम्भावनाबारे समेत चासो व्यक्त गरेका थिए। प्राकृतिक सम्पदाले भरिपूर्ण सौराहालाई संरक्षण र प्रवर्द्धन गर्नुपर्ने आवश्यकता रहेको विषयमा उनले सकारात्मक धारणा राखेको स्थानीय स्रोतले जनाएको छ।
यसैबीच, प्रधानमन्त्री शाह कालिका नगरपालिका–शक्तिखोरस्थित होटल लटौली सेन्चुरीमा बसोबास गरिरहेका छन्।
प्रधानमन्त्रीको चितवन बसाइलाई औपचारिक राजनीतिक कार्यक्रमभन्दा बढी पारिवारिक तथा पर्यटनमैत्री भ्रमणका रूपमा हेरिएको छ। सौराहामा उनको उपस्थितिले स्थानीय पर्यटन व्यवसायमा उत्साह थप्नुका साथै क्षेत्रको प्रचारप्रसारमा समेत सकारात्मक प्रभाव पर्ने अपेक्षा गरिएको छ।
प्रकाशित मिति: ८ असार २०८३, सोमबार
प्रतिक्रिया