एजेन्सी । अमेरिका र इरानबीच सम्भावित वार्ताको वातावरण बनेसँगै अन्तर्राष्ट्रिय बजारमा कच्चा तेलको मूल्यमा गिरावट आएको छ। मध्यपूर्वको तनाव कम हुने अपेक्षाले लगानीकर्तामा आशा बढेपछि मंगलबार तेलको भाउ ओरालो लागेको हो।
यद्यपि, चार महिनादेखि जारी द्वन्द्वपछि लागू भएको अस्थायी युद्धविराम अझै पूर्ण रूपमा स्थिर भइनसकेको र चीनबाट अपेक्षाअनुसार कच्चा तेलको माग नबढेकाले बजारमा सतर्कता कायम रहेको विश्लेषकहरूको भनाइ छ।
मंगलबार लन्डनस्थित आईसीई एक्सचेञ्जमा अन्तर्राष्ट्रिय बेन्चमार्क ब्रेन्ट क्रुडको मूल्य ०.९ प्रतिशतले घटेर प्रतिब्यारेल ७२ डलर ५१ सेन्टमा झरेको छ। यो मूल्य गत महिनाको अन्त्यको तुलनामा करिब २२ प्रतिशत अर्थात् झण्डै २० डलरले कम हो।
यस्तै, न्यूयोर्क मर्कन्टाइल एक्सचेञ्ज (एनवाइएमईएक्स) मा कारोबार हुने अमेरिकी बेन्चमार्क वेस्ट टेक्सास इन्टरमिडियट (डब्ल्यूटीआई) पनि ०.६ प्रतिशतले घट्दै प्रतिब्यारेल ७० डलर ३६ सेन्टमा कारोबार भएको छ। यो मे २९ को तुलनामा करिब १९ प्रतिशत अर्थात् १७ डलरले घटेको मूल्य हो।
विश्लेषकहरूका अनुसार दुवै प्रमुख तेल सूचकांक अहिले फेब्रुअरीको अन्त्यतिर मध्यपूर्वमा युद्ध सुरु हुनुअघिको मूल्यस्तर नजिक पुगेका छन्।
केसीएम ट्रेड्सका प्रमुख बजार विश्लेषक टिम वाटररले दोहामा अमेरिका–इरानबीच सम्भावित वार्ताबाट सकारात्मक नतिजा आउने अपेक्षाले बजारमा तेलको मूल्य घटेको बताए। तर, उनले होर्मुज जलडमरूमध्यबाट तेल आपूर्ति पूर्ण रूपमा सामान्य भइसकेको स्पष्ट संकेत अझै नदेखिएकाले लगानीकर्ताहरू सावधानीमै रहेको उल्लेख गरे।
यसैबीच, इरानका उपविदेशमन्त्री काजेम घरिबाबादीले इरान र ओमानका प्राविधिक टोलीबीच आगामी केही दिनभित्र होर्मुज जलडमरूमध्यमा जहाज आवतजावतको मार्ग पुनः निर्धारणबारे छलफल हुने जानकारी दिएका छन्। उनले तोकिएको मार्गबाहिर सञ्चालन हुने जहाजलाई नियन्त्रण गर्ने प्रयास गरिने पनि बताएका छन्।
यद्यपि, इरानका विदेश मन्त्रालयका प्रवक्ता इस्माइल बघाईले निकट भविष्यमा अमेरिकासँग कुनै औपचारिक वार्ता नहुने स्पष्ट पारेका छन्।
उता, अमेरिकी राष्ट्रपति डोनाल्ड ट्रम्पले दोहामा सम्भावित बैठकबारे प्रतिक्रिया दिँदै त्यसले महत्वपूर्ण परिणाम दिन पनि सक्ने र नदिन पनि सक्ने भन्दै वार्ताको नतिजा पर्खिनुपर्ने बताएका छन्।
प्रकाशित मिति: १६ असार २०८३, मंगलबार
प्रतिक्रिया