काठमाडौँ । सरकारले त्रिभुवन विश्वविद्यालय (त्रिवि) मा अध्ययन बिदामा गएर तोकिएको समयभित्र सेवामा नफर्कने ४०० प्राध्यापकविरुद्ध कारबाही गरेको जनाएको छ।
सरकारले सार्वजनिक गरेको १०० दिने उपलब्धि प्रतिवेदनअनुसार, अध्ययन बिदाको दुरुपयोग गर्ने ती प्राध्यापकहरूबाट कारबाहीस्वरूप १३ करोड २६ लाख रुपैयाँ राजस्व फिर्ता गरिएको छ।
प्रधानमन्त्री तथा मन्त्रिपरिषद्को कार्यालयका अनुसार अध्ययन बिदा लिएर पनि समयमा जिम्मेवारीमा नफर्कने प्रवृत्तिलाई निरुत्साहित गर्न यो कदम चालिएको हो। यसबाट जिम्मेवार पदमा रहेका व्यक्तिहरूको गैरजिम्मेवारी नियन्त्रण हुनुका साथै राज्यकोषमा उल्लेख्य रकम फिर्ता ल्याउन सफल भएको सरकारको दाबी छ।
सरकारले सार्वजनिक खर्चमा मितव्ययिता र जवाफदेहितालाई प्रवर्द्धन गर्ने नीतिअनुसार उक्त कारबाही गरिएको उल्लेख गरेको छ।
प्रकाशित मिति: २० असार २०८३, शनिबार
प्रतिक्रिया