काठमाडौं । महोत्तरीको एकडारा गाउँपालिका–३ अजमरपट्टीबाट सशस्त्र प्रहरीले ट्रकमा फल्स बटम बनाएर लुकाइछिपाइ राखिएको गाँजासहित दुई जनालाई पक्राउ गरेको छ।
पक्राउ पर्नेमा मकवानपुरको कैलाश गाउँपालिका–१ का २३ वर्षीय साधुराम थिङ र सोही गाउँपालिका–६ का २१ वर्षीय विपस नेगी रहेका छन्। उनीहरू क्रमशः ट्रकका मालिक र चालक हुन्।
विशेष सूचनाका आधारमा बोर्डर आउट पोस्ट बथनाहाबाट खटिएको सशस्त्र प्रहरी टोलीले ना ३ ख ६५९२ नम्बरको ट्रक रोक्न खोज्दा चालकले नरोकी तीव्र गतिमा भागेका थिए। करिब दुई किलोमिटर पछ्याएर ट्रक नियन्त्रणमा लिइएको थियो।
जाँचका क्रममा चालक बस्ने क्याबिनको माथिल्लो भागमा बनाइएको फल्स बटमभित्र लुकाइएका तीन बन्डल गाँजाजस्तो पदार्थ फेला परेको प्रहरीले जनाएको छ। साथै उनीहरूको साथबाट नेपाली रुपैयाँ, कतारी रियाल, मलेसियन रिङ्गेट, दुई थान मोबाइल, ट्रक र मोटरसाइकलको ब्लुबुकसमेत बरामद गरिएको छ।
प्रकाशित मिति: २१ असार २०८३, आइतबार
प्रतिक्रिया