काठमाडौ । रुपन्देही प्रहरीले बैंकिङ कसुर मुद्दामा एक महिलालाई पक्राउ गरेको छ।
इलाका प्रहरी कार्यालय बुटवलले सैनामैना नगरपालिका निवासी तथा हाल बुटवल उपमहानगरपालिका–दीपनगर बस्दै आएकी पार्वती पन्त पौडेललाई शुक्रबार पक्राउ गरेको हो।
प्रहरीका अनुसार पौडेलले सम्राट चन्दलाई ११ लाख रुपैयाँको चेक दिएपछि उक्त चेक हराएको भन्दै बैंकमा भुक्तानी रोक्न निवेदन दिएकी थिइन्। सोही घटनासम्बन्धी बैंकिङ कसुर मुद्दामा उनीविरुद्ध पक्राउ पुर्जी जारी भएको थियो।
इलाका प्रहरी कार्यालय बुटवलका प्रहरी निरीक्षक थम्मन जिसीका अनुसार पक्राउ परेकी पौडेललाई थप अनुसन्धानका लागि जिल्ला प्रहरी कार्यालय रुपन्देही पठाइएको छ।
जिल्ला प्रहरी कार्यालय रुपन्देहीका डीएसपी कृष्ण चन्दले उनलाई भैरहवा ल्याएर घटनाबारे थप अनुसन्धान भइरहेको जानकारी दिएका छन्।
प्रकाशित मिति: २६ असार २०८३, शुक्रबार
प्रतिक्रिया