काठमाडौँ । गणेश नेपालीको आत्मदाह प्रकरणमा सोधपुछका लागि नियन्त्रणमा लिइएका तीन जना काठमाडौँ महानगर प्रहरीलाई शुक्रबार सोधपुछपछि रिहा गरिएको छ।
त्रिपुरेश्वरस्थित राहदानी विभाग अगाडि मोटरसाइकलमा ‘ह्वील लक’ लगाएको विषयमा विवाद भएपछि आत्मदाह गरेका गणेश नेपालीको उपचारका क्रममा मृत्यु भएको थियो।
घटनापछि विवादमा संलग्न दुई महिला र एक पुरुष महानगर प्रहरीसँग अनुसन्धान अधिकृतहरूले दिनभर सोधपुछ गरेका थिए।
जिल्ला प्रहरी परिसर काठमाडौँका अनुसार घटनास्थलमा रहेका मिना नगरकोटी, मिना तामाङ र एक पुरुष महानगर प्रहरी कर्मचारीसँग बयान लिएर रिहा गरिएको हो। एसपी पवन भट्टराईले आवश्यक परे पुनः सोधपुछका लागि बोलाइने बताएका छन्।
प्रहरीका अनुसार गणेशले निषेधित क्षेत्रमा पार्किङ गरिएको भन्दै आफ्नो मोटरसाइकलमा मात्र ‘ह्वील लक’ लगाइएको भन्दै महानगर प्रहरीसँग विवाद गरेका थिए। उक्त घटनाबारे प्रहरी वृत्त कालिमाटीले थप अनुसन्धान गरिरहेको छ।
प्रकाशित मिति: २६ असार २०८३, शुक्रबार
प्रतिक्रिया