काठमाडौं । आकर्षक तलबसहित वैदेशिक रोजगारीमा पठाइदिने भन्दै सर्वसाधारणबाट लाखौं रुपैयाँ ठगी गरेको आरोपमा पाँच जना पक्राउ परेका छन्।
पक्राउ पर्नेमा सिन्धुलीका ३६ वर्षीय कुनसाङ लामा, बर्दियाका ४२ वर्षीय धनबहादुर शाही, ताप्लेजुङका उमेश लिम्बु, तनहुँकी २१ वर्षीया सचिता परियार र खोटाङका ४१ वर्षीय निरोज राई रहेका छन्।
प्रहरीका अनुसार उनीहरूले यूएई, जर्जिया, बेलारुस, रोमानिया र टर्की पठाइदिने प्रलोभन देखाउँदै विभिन्न पीडितबाट रकम असुलेपछि सम्पर्कविहीन भएका थिए। उनीहरूबाट ठगी भएको रकम करिब १९ लाख ४२ हजार रुपैयाँ रहेको प्रहरीले जनाएको छ।
पीडितहरूको उजुरीका आधारमा काठमाडौं उपत्यका अपराध अनुसन्धान कार्यालय, टेकुको टोलीले उनीहरूलाई काठमाडौंका विभिन्न स्थानबाट पक्राउ गरेको हो।
पक्राउ परेका सबैलाई थप अनुसन्धान तथा कानुनी कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ।
प्रकाशित मिति: २७ असार २०८३, शनिबार
प्रतिक्रिया