प्योङयाङ । शक्तिशाली टाइफुन ‘बावी’ को प्रभाव बढ्न थालेपछि उत्तर र दक्षिण कोरिया उच्च सतर्कतामा गएका छन्। सम्भावित भारी वर्षा, तीव्र हावाहुरी र बाढी–पहिरोको जोखिमलाई ध्यानमा राख्दै उत्तर कोरियाली नेता किम जोङ–उनले सबै सरकारी निकायलाई अधिकतम तयारी गर्न निर्देशन दिएका छन्।
सरकारी सञ्चारमाध्यमका अनुसार किमले प्राकृतिक विपद्बाट हुने जनधनको क्षति न्यून गर्न अधिकारी तथा श्रमिकहरूलाई तत्काल सुरक्षात्मक उपाय अपनाउन र विपद् व्यवस्थापनलाई उच्च प्राथमिकतामा राख्न आग्रह गरेका छन्।
उत्तर कोरियाको मौसम विभागले मंगलबारदेखि बुधबारसम्म देशका मध्य तथा उत्तरी क्षेत्रमा प्रति घण्टा ३० देखि ६० मिलिमिटरसम्म वर्षा हुन सक्ने जनाएको छ। केही स्थानमा ८० देखि १२० मिलिमिटरसम्म वर्षा हुने अनुमान गरिएको छ भने दक्षिणी क्षेत्रमा १५० देखि २०० मिलिमिटरसम्म वर्षा र १० देखि १५ मिटर प्रतिक्षणको गतिमा हावा चल्ने पूर्वानुमान गरिएको छ।
सरकारी दैनिक रोडोङ सिनमुन का अनुसार टाइफुन ‘बावी’ पहेँलो सागर हुँदै उत्तर कोरियाको मध्य भाग पार गर्ने क्रममा कमजोर भई न्यून चापीय प्रणालीमा परिणत हुने अपेक्षा गरिएको भए पनि भारी वर्षा र हावाहुरीको जोखिम अझै कायम रहेको छ।
उता दक्षिण कोरियामा पनि अविरल वर्षाले जनजीवन प्रभावित बनेको छ। केही क्षेत्रमा २०० मिलिमिटरसम्म वर्षा भएपछि बाढी र पहिरोको जोखिम बढेको छ। मध्य चुङचेओङ प्रान्तका सयौं बासिन्दालाई सुरक्षित स्थानमा सारिएको छ भने ग्योंगसाङ क्षेत्रमा नदीको तीव्र बहावमा एक जना बेपत्ता भएको स्थानीय सञ्चारमाध्यमले जनाएका छन्।
दक्षिण कोरियाको मौसम प्रशासनले देशभर विशेषगरी मध्य र दक्षिणी क्षेत्रमा थप भारी वर्षाको चेतावनी जारी गर्दै सर्वसाधारणलाई सतर्क रहन आग्रह गरेको छ।
मौसमविद्हरूले जलवायु परिवर्तनका कारण चरम मौसमी घटना थप तीव्र र बारम्बार दोहोरिन थालेको बताएका छन्। गत वर्ष दक्षिण कोरियाले इतिहासकै सबैभन्दा तातो गर्मीयाम अनुभव गरेको थियो भने यस वर्षको जुन महिनामा दुवै कोरियाले रेकर्डस्तरको तापक्रम भोगेका थिए। वैज्ञानिकहरूका अनुसार यस वर्ष प्रशान्त महासागरमा सक्रिय भएको ‘एल निनो’ प्रभावले एसियाभर अत्यधिक वर्षा, गर्मी र अन्य प्राकृतिक विपद्को जोखिम थप बढाएको छ।
प्रकाशित मिति: ३० असार २०८३, मंगलबार
प्रतिक्रिया