काठमाडौं । म्यानमारको राखाइन राज्यबाट समुद्री मार्ग हुँदै सुरक्षित गन्तव्यतर्फ गइरहेका ५०० भन्दा बढी शरणार्थी सवार दुईवटा डुङ्गा दुर्घटनामा परेको आशंका गरिएको छ। संयुक्त राष्ट्रसंघीय निकायहरूले यस घटनामा ठूलो मानवीय क्षति भएको हुन सक्ने भन्दै गम्भीर चिन्ता व्यक्त गरेका छन्।
अन्तर्राष्ट्रिय आप्रवासन संगठन (IOM) र संयुक्त राष्ट्रसंघीय शरणार्थी उच्चायुक्त (UNHCR) ले जारी गरेको संयुक्त विज्ञप्तिअनुसार दुवै डुङ्गा जुन महिनाको अन्त्यतिर म्यानमारको राखाइन राज्यबाट प्रस्थान गरेका थिए। ती डुङ्गामा अधिकांश रोहिङ्ग्या शरणार्थी सवार थिए भने केही यात्रु बङ्गलादेशको कक्स बजारस्थित शरणार्थी शिविरबाट आएका थिए।
प्रारम्भिक जानकारीअनुसार करिब २५० जना बोकेको पहिलो डुङ्गा समुद्रमा निस्किएलगत्तै सम्पर्कविहीन भएको थियो। त्यस्तै, करिब २८० जना सवार दोस्रो डुङ्गा जुलाई ८ मा म्यानमारको आययारवाडी तटीय क्षेत्रमा डुबेको विश्वास गरिएको छ।
राष्ट्रसंघीय निकायहरूले घटनामा ५०० भन्दा बढी मानिसको ज्यान गएको हुन सक्ने आशंका गरे पनि मृत्यु तथा बेपत्ताको आधिकारिक संख्या अझै पुष्टि हुन बाँकी रहेको बताएका छन्।
रोहिङ्ग्या समुदायका नागरिकहरू म्यानमारमा जारी हिंसा, उत्पीडन तथा बङ्गलादेशका भीडभाडयुक्त शरणार्थी शिविरको कठिन जीवनबाट बच्न मलेसिया, इन्डोनेसिया र थाइल्याण्डजस्ता मुलुक पुग्ने प्रयासमा जोखिमपूर्ण समुद्री यात्रा गर्ने गरेका छन्।
आईओएम र यूएनएचसीआरका अनुसार यो यात्रा समुद्रमा डुङ्गा सञ्चालनका लागि प्रतिकूल मौसममा गरिएको थियो, जसका कारण दुर्घटनाको जोखिम झनै बढेको थियो। यस वर्ष मात्रै अन्डमान सागर र बङ्गालको खाडी क्षेत्रमा रोहिङ्ग्या शरणार्थी र बङ्गलादेशी नागरिकसहित करिब ३०० जना बेपत्ता वा मृत घोषित भइसकेका छन्।
संयुक्त राष्ट्रसंघले समुद्री मार्ग हुँदै हुने यस्ता जोखिमपूर्ण यात्रालाई रोक्न तथा शरणार्थीहरूको सुरक्षा सुनिश्चित गर्न अन्तर्राष्ट्रिय समुदायलाई थप प्रभावकारी पहल गर्न आग्रह गरेको छ।
प्रकाशित मिति: ३२ असार २०८३, बिहिबार
प्रतिक्रिया