एजेन्सी । पश्चिम एसियामा अमेरिका र इरानबीच बढ्दो सैन्य तनावका कारण अन्तर्राष्ट्रिय तेल बजारमा दबाब बढेको छ। स्ट्रेट अफ होर्मुज हुँदै हुने तेल ढुवानी प्रभावित भएपछि सोमबार कच्चा तेलको मूल्य करिब ३ प्रतिशतले उकालो लागेको छ।
सोमबार बिहानको कारोबारमा ब्रेन्ट क्रुडको मूल्य प्रतिब्यारल २.७७ डलर अर्थात् ३.१४ प्रतिशतले बढेर ९०.८७ डलर पुगेको छ। यो मूल्य गत जुन ११ यताकै उच्च हो। अघिल्लो सातामात्र ब्रेन्टको मूल्य १५.९ प्रतिशतले बढेको थियो, जुन अप्रिलयताकै सबैभन्दा ठूलो साप्ताहिक वृद्धि मानिएको छ।
यस्तै, अमेरिकी वेस्ट टेक्सस इन्टरमिडिएट (डब्लुटीआई) क्रुडको मूल्य पनि २.३५ डलर अर्थात् २.८५ प्रतिशतले वृद्धि भएर प्रतिब्यारल ८४.८४ डलर पुगेको छ। यो पनि जुन १२ यताकै उच्च स्तर हो। गत सातामात्र डब्लुटीआईको मूल्य १५.५ प्रतिशतले बढेको थियो।
सप्ताहन्तमा अमेरिकाले इरानविरुद्ध लगातार नवौँ रातसम्म सैन्य आक्रमण जारी राखेको जनाएको छ। उता, अमेरिकी साझेदार राष्ट्र कुवेत र बहराइनले पनि इरानी आक्रमणको सामना गर्नुपरेको जानकारी दिएका छन्।
बजार विश्लेषकहरूले खाडी क्षेत्रमा तनाव तत्काल कम हुने संकेत नदेखिएकाले तेलको मूल्यमा थप दबाब पर्न सक्ने बताएका छन्। उनीहरूका अनुसार अमेरिका र इरानबीचको सैन्य गतिविधि नियन्त्रणमा नआए खाडी क्षेत्रमा थप व्यापक द्वन्द्वको जोखिम बढ्न सक्छ।
यसैबीच, इरानको इस्लामिक रिभोलुसनरी गार्ड कर्प्स (आईआरजीसी) ले दुई तेल ट्याङ्करमा विस्फोट भई आवतजावत प्रभावित भएको जनाएको छ। इरानले ती जहाजले स्ट्रेट अफ होर्मुजको दक्षिणी मार्ग प्रयोग गर्ने क्रममा क्षति बेहोरेको र त्यसका लागि अमेरिकी सेनाले उक्साएको आरोप लगाएको छ।
पछिल्ला दिनमा दुवै पक्षले समुद्री व्यापारिक जहाजलाई लक्षित गर्दै आएका छन्। अमेरिकाले इरानी बन्दरगाहमाथि समुद्री नाकाबन्दी लागू गरेको जनाएको छ भने इरानले स्ट्रेट अफ होर्मुजमा आफ्नो नियम उल्लंघन गर्ने जहाजमाथि कारबाही गरिरहेको दाबी गरेको छ।
युनाइटेड किङडम म्यारिटाइम ट्रेड अपरेसन्स (यूकेएमटीओ) का अनुसार सोमबार बिहान ओमानको कुमजार क्षेत्रको उत्तर–पश्चिममा एक जहाजमा आगलागी भएको थियो।
एलएसइजीको तथ्यांकअनुसार स्ट्रेट अफ होर्मुज हुँदै हुने जहाज आवागमनमा पनि उल्लेखनीय गिरावट आएको छ। अघिल्लो दिन आठवटा जहाजले उक्त जलमार्ग पार गरेकामा आइतबार चारवटाले मात्र पार गरेका थिए। शुक्रबारयता कम्तीमा तीनवटा तेल ट्याङ्कर र एउटा ठूलो कच्चा तेलवाहक जहाज मात्र तेल लोड गर्न जलमार्गमा प्रवेश गरेको तथ्यांकले देखाएको छ।
प्रकाशित मिति: ४ श्रावण २०८३, सोमबार
प्रतिक्रिया