काठमाडौं । ब्राजिल सरकारले आगामी राष्ट्रपति निर्वाचनअघि चुनावी प्रक्रियामा हस्तक्षेप गर्ने प्रयास भएको आरोप लगाउँदै अमेरिकी राष्ट्रपति डोनाल्ड ट्रम्प प्रशासनका दुई वरिष्ठ अधिकारीलाई प्रवेश भिसा दिन अस्वीकार गरेको छ।
अन्तर्राष्ट्रिय समाचार संस्था रोयटर्सका अनुसार ब्राजिल सरकारले अमेरिकी प्रतिनिधिमण्डलको भ्रमणले विद्युतीय मतदान प्रणाली र निर्वाचनको विश्वसनीयतामाथि अनावश्यक शंका उत्पन्न गरी चुनावी वातावरण प्रभावित पार्ने उद्देश्य राखेको निष्कर्षसहित भिसा आवेदन अस्वीकृत गरेको हो।
भिसा अस्वीकार गरिएका अधिकारीहरूमा अमेरिकी विदेश मन्त्रालयअन्तर्गतको ब्युरो अफ डेमोक्रेसी, ह्युमन राइट्स एन्ड लेबरका सहायक सचिव रिले एम. बार्न्स र उप-सहायक सचिव स्यामुअल स्याम्सन रहेका छन्। उनीहरूको भ्रमण आगामी अक्टोबरमा हुने राष्ट्रपतीय निर्वाचनअघि तय गरिएको थियो।
ब्राजिलका अधिकारीहरूका अनुसार अमेरिकी प्रतिनिधिमण्डलको प्रस्तावित भ्रमणले निर्वाचन प्रणालीप्रति अविश्वास फैलाउने र राजनीतिक रूपमा लाभ उठाउने प्रयास देखिएकाले भिसा नदिने निर्णय गरिएको हो। अमेरिकी विदेश मन्त्रालय र दक्षिणपन्थी नेता फ्लावियो बोल्सोनारोले भने यसबारे तत्काल कुनै प्रतिक्रिया दिएका छैनन्।
आगामी निर्वाचनमा वर्तमान राष्ट्रपति लुइज इनासियो लुला डा सिल्भा र ट्रम्प समर्थक नेता फ्लावियो बोल्सोनारोबीच मुख्य प्रतिस्पर्धा हुने अपेक्षा गरिएको छ। यसैबीच ट्रम्प प्रशासनले पछिल्लो समय ल्याटिन अमेरिकाका विभिन्न दक्षिणपन्थी नेताहरूलाई खुलेर समर्थन गर्दै आएको छ।
ब्राजिलका पूर्वराष्ट्रपति जायर बोल्सोनारोले सन् २०२२ को निर्वाचनअघि विद्युतीय मतदान प्रणालीमा धाँधली हुन सक्ने आरोप लगाएका थिए। निर्वाचनमा पराजित भएपछि अदालतले उनलाई पदको दुरुपयोग गरेको ठहर गर्दै सन् २०३० सम्म चुनाव लड्न प्रतिबन्ध लगाएको थियो। पछि निर्वाचन परिणाम उल्ट्याउने षड्यन्त्रमा दोषी ठहर भएपछि उनलाई २७ वर्षको जेल सजाय सुनाइएको थियो।
हाल उनका छोरा फ्लावियो बोल्सोनारोले पनि निर्वाचन प्रणालीमाथि प्रश्न उठाइरहेका छन्। यद्यपि, ब्राजिलको निर्वाचन अदालत र सम्बन्धित प्राविधिक निकायहरूले देशको विद्युतीय मतदान प्रणाली सुरक्षित, पारदर्शी र विश्वसनीय रहेको स्पष्ट पार्दै आएका छन्।
प्रकाशित मिति: १० श्रावण २०८३, आइतबार
प्रतिक्रिया