वीरगञ्ज । वीरगञ्जस्थित नारायणी अस्पतालमा चिकित्सकमाथि कुटपिट र अस्पतालमा तोडफोड भएको घटनापछि जिल्ला प्रहरी कार्यालय पर्साका प्रमुख प्रहरी उपरीक्षक (एसपी) सुदीप पाठकको सरुवा गरिएको छ।
गृह मन्त्रालयले एसपी पाठकलाई जिम्मेवारीबाट हटाउँदै उनको स्थानमा काठमाडौँ प्रहरी परिसरका प्रवक्ता एसपी पवन भट्टराईलाई पर्साको प्रहरी प्रमुखका रूपमा पठाएको हो।
नारायणी अस्पतालमा उपचाररत एक बिरामीको मृत्यु भएपछि आक्रोशित आफन्तले अस्पतालमा तोडफोड गर्नुका साथै चिकित्सक तथा स्वास्थ्यकर्मीमाथि कुटपिट गरेको आरोप छ। घटनापछि जिल्ला प्रशासन कार्यालय पर्सामा भएको छलफलका क्रममा समेत चिकित्सकमाथि दुर्व्यवहार भएको भन्दै नेपाल चिकित्सक संघले विरोध जनाउँदै आएको छ।
घटनाको विरोधमा नेपाल चिकित्सक संघले देशभर आकस्मिकबाहेकका स्वास्थ्य सेवा बन्द गरेर आन्दोलन गर्दै आएको छ। संघले घटनामा संलग्नमाथि कानुनी कारबाही, स्वास्थ्यकर्मीको सुरक्षा सुनिश्चितता र घटनामा जिम्मेवार अधिकारीमाथि समेत कारबाहीको माग गरेको छ। वीरगञ्जस्थित नारायणी अस्पतालका चिकित्सकहरूले सामूहिक राजीनामासमेत बुझाएका छन्।
यसैबीच स्वास्थ्य तथा जनसंख्या मन्त्रालयले घटनामा संलग्नलाई कानुनी दायरामा ल्याउने प्रक्रिया अघि बढाइएको जनाएको छ। मन्त्रालयले स्वास्थ्य सेवा अवरुद्ध नगर्न सबै अस्पताल तथा स्वास्थ्यकर्मीलाई आग्रहसमेत गरेको छ।
चिकित्सकहरूको आन्दोलनका कारण देशभरका विभिन्न स्वास्थ्य संस्थामा नियमित उपचार सेवा प्रभावित भएको छ। उपचारका लागि अस्पताल पुगेका बिरामीले समेत सेवा लिन कठिनाइ भोगिरहेका छन्।
नारायणी अस्पताल घटनापछि पर्साका प्रहरी प्रमुखको सरुवालाई सुरक्षा व्यवस्थापन तथा घटनापछिको प्रशासनिक जिम्मेवारीसँग जोडेर हेरिएको छ। यद्यपि गृह मन्त्रालयले एसपी पाठकको सरुवाको औपचारिक कारणबारे विस्तृत विवरण सार्वजनिक गरेको छैन।
प्रकाशित मिति: १३ श्रावण २०८३, बुधबार
प्रतिक्रिया