काठमाडौं । पूर्वप्रधानमन्त्री तथा नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले मुलुकको वर्तमान राजनीतिक अवस्था चिन्ताजनक बन्दै गएको बताएका छन्। प्रतिनिधिसभाको बिहीबारको बैठकमा विशेष समय लिएर सम्बोधन गर्दै उनले सरकार जनताले व्यक्त गरेको जनादेशअनुसार काम गर्न असफल भएको आरोप लगाए।
प्रचण्डले पछिल्लो राजनीतिक घटनाक्रमले नागरिकको अपेक्षा पूरा गर्न नसकेको उल्लेख गर्दै सरकारका कामकारबाहीप्रति असन्तुष्टि बढ्दै गएको बताए।
‘देशको समग्र राजनीतिक अवस्था अहिले सहज छैन। लोकतन्त्रमा सबैले आफ्नो विचार राख्नु स्वाभाविक हो। तर, पछिल्लो निर्वाचनमा जनताले दिएको जनादेश र अपेक्षाअनुसार सरकार अघि बढ्न सकेको देखिँदैन,’ उनले भने।
उनका अनुसार सरकारका गतिविधिले नागरिकमा आशा जगाउनुको सट्टा निराशा बढाएको छ। जनअपेक्षा सम्बोधन हुन नसक्दा मुलुकको राजनीतिक तथा सामाजिक वातावरण झन् जटिल बन्दै जाने चिन्ता व्यक्त गर्दै उनले परिस्थितिलाई गम्भीर रूपमा लिन सरकारलाई आग्रह गरे।
‘दिनप्रतिदिन अवस्था थप असहज बन्दै जाने हो कि भन्ने चिन्ता समाजमा बढिरहेको छ,’ प्रचण्डले भने, ‘यस्तो अवस्थालाई सबै राजनीतिक शक्तिले गम्भीरतापूर्वक आत्मसात् गर्दै समाधानतर्फ अग्रसर हुनुपर्छ।’
प्रकाशित मिति: १४ श्रावण २०८३, बिहिबार
प्रतिक्रिया