काठमाडौं । नेकपा (एमाले)का महासचिव शंकर पोखरेलले वर्तमान परिस्थितिमा संविधान संशोधन गर्नु उपयुक्त नहुने बताएका छन्। उनले संविधान संशोधनजस्तो संवेदनशील विषयमा अघि बढ्नुअघि प्रमुख राजनीतिक दलहरूबीच व्यापक सहमति आवश्यक पर्ने धारणा व्यक्त गरेका हुन्।
आइतबार सामाजिक सञ्जालमार्फत आफ्नो धारणा सार्वजनिक गर्दै पोखरेलले सरकारले संविधान संशोधनको प्रक्रिया अघि बढाउने सोच बनाएको भए त्यसअघि सबै राजनीतिक शक्तिहरूबीच विश्वास र सहमतिको वातावरण निर्माण गर्नुपर्ने बताएका छन्।
उनले संविधान संशोधन कुनै एक पक्षको निर्णय वा इच्छाले नभई राष्ट्रिय सहमतिका आधारमा हुनुपर्ने उल्लेख गर्दै अहिले त्यसका लागि अनुकूल परिस्थिति नरहेको बताएका छन्।
पोखरेलले लेखेका छन्, ‘सरकारले संविधान संशोधन गर्न खोजेको हो भने राजनीतिक दलहरूबीच सहमति जुटाउनु पर्दछ। तर अहिले संविधान संशोधन गर्ने उचित समय होइन।’
उनको अभिव्यक्तिलाई संविधान संशोधनबारे पछिल्लो समय भइरहेको राजनीतिक बहसप्रतिको एमालेको दृष्टिकोणका रूपमा समेत हेरिएको छ।
प्रकाशित मिति: १७ श्रावण २०८३, आइतबार
प्रतिक्रिया