एजेन्सी । युद्ध अन्त्य गर्ने सम्भावित सम्झौतामा हमासले सहमति जनाएको दाबी गरे पनि गाजा क्षेत्रमा इजरायली सैन्य आक्रमण रोकिएको छैन। स्थानीय अधिकारीहरूका अनुसार शनिबार रातभर भएका हवाई आक्रमणमा कम्तीमा आठ जनाको मृत्यु भएको छ भने दर्जनौँ घाइते भएका छन्।
हमासले शुक्रबार अमेरिकी राष्ट्रपति डोनाल्ड ट्रम्पले अघि सारेको युद्धविराम प्रस्ताव स्वीकार गरेको जनाएको थियो। प्रस्तावमा हमासको हतियार व्यवस्थापन तथा गाजा क्षेत्रबाट इजरायली सेनाको चरणबद्ध फिर्तीसम्बन्धी व्यवस्था समावेश रहेको बताइएको छ।
तर, इजरायलले उक्त दाबीबारे हालसम्म कुनै औपचारिक प्रतिक्रिया दिएको छैन। इजरायली राजनीतिक स्रोतलाई उद्धृत गर्दै एएफपीले हमासको पूर्ण निःशस्त्रीकरण नभएसम्म सेना फिर्ता नहुने अडान कायम रहेको जनाएको छ।
गाजाको नागरिक सुरक्षा निकायका अनुसार पछिल्लो आक्रमणमा विभिन्न आवासीय भवनहरू प्रत्यक्ष निसानामा परेका छन्। मध्य गाजामा इजरायली हेलिकप्टरले एक अपार्टमेन्टमा गरेको आक्रमणमा एक दम्पतीको मृत्यु भएको छ भने अन्य केही व्यक्ति घाइते भएका छन्।
त्यस्तै, गाजा सहरको पश्चिमी क्षेत्रमा रहेको अर्को आवासीय भवनमा भएको आक्रमणमा एक वृद्ध र एक बालकको ज्यान गएको छ। दक्षिणी गाजाको खान युनिसको उत्तर–पश्चिममा रहेको अर्को अपार्टमेन्टमा गरिएको बमबारीमा एक बालकसहित तीन जनाको मृत्यु भएको अधिकारीहरूले पुष्टि गरेका छन्।
यसअघि शनिबार दिनभर भएका छुट्टाछुट्टै आक्रमणमा पनि अन्य आठ जनाले ज्यान गुमाएका थिए। ती आक्रमणका क्रममा एउटा अस्पतालको चिकित्सा सामग्रीमा क्षति पुगेको तथा भवनको छतसमेत आक्रमणको लक्ष्य बनेको स्थानीय अधिकारीहरूले बताएका छन्।
युद्धविरामको सम्भावनाबारे चर्चा भइरहेका बेला पनि गाजामा हिंसा नरोकिँदा शान्ति प्रयासप्रति थप अन्योल उत्पन्न भएको छ।
प्रकाशित मिति: १७ श्रावण २०८३, आइतबार
प्रतिक्रिया