काठमाडौं । नेपाल आयल निगमले बजारमा खाना पकाउने ग्यासको अभाव भएको भन्ने समाचारप्रति ध्यानाकर्षण भएको जनाउँदै मागअनुसार नियमित रूपमा ग्यास आपूर्ति भइरहेको जनाएको छ। निगमका अनुसार १४.२ किलोग्राम क्षमताका ग्यास सिलिन्डरको बिक्री–वितरण सहज रूपमा भइरहेको छ।
उपभोक्ताको सुविधाका लागि काठमाडौंको टेकुस्थित निगम कार्यालयबाट विभिन्न ग्यास कम्पनीका सिलिन्डर बिहान ११ बजेदेखि साँझ ५ बजेसम्म बिक्री–वितरण भइरहेको निगमले जनाएको छ। ग्यास नपाएमा हटलाइन नम्बर ०१–५९७१९०२ मा सम्पर्क गर्न पनि आग्रह गरिएको छ।
निगमका अनुसार हाल मासिक औसत ४७ हजार मेट्रिक टन ग्यास खपत हुँदै आएको छ भने साउन १ देखि १८ गतेसम्म ३१ हजार ८१६ मेट्रिक टन ग्यास आयात भइसकेको छ। आवश्यकता अनुसार मात्रै ग्यास खरिद गर्न र अनावश्यक भण्डारण नगर्न पनि निगमले उपभोक्तासँग आग्रह गरेको छ।
प्रकाशित मिति: १९ श्रावण २०८३, मंगलबार
प्रतिक्रिया