काठमाडौं । उद्योग, वाणिज्य तथा आपूर्तिमन्त्री गौरीकुमारी यादवले ग्यास बितरणको अवस्थाबारे स्थलगत अनुगमन गरेकी छन् । बजारमा खाना पकाउने ग्यास अभाव कायमै रहेपछि शनिबार मन्त्री यादवले बिभिन्न ग्यास उद्योगका साथै आयल निगमको टेकुस्थित बितरण केन्द्रको स्थलगत अनुगमन गरेकी हुन् ।
अनुगमनका क्रममा मन्त्री यादवले ग्यासको बितरण प्रक्रियाका बारेमा जानकारी लिदै छिटो भन्दा छिटो सहज रुपमा ग्यास पाउने अवस्था बनाउन निर्देशन दिएकी थिइन् । सो क्रममा नेपाल आयल निगम लिमिटेडका कार्यकारी निर्देशक नागेन्द्र साहले अहिले भारतबाट ग्यास आपूर्तिमा कुनै समस्या नदेखिएको भन्दै बितरण प्रणालीमा देखिएको समस्या छिटै समाधान हुने बताए ।
नेपालमा दैनिक करिब ९० हजारदेखि १ लाख ग्यास सिलिन्डरको माग रहेकोमा हाल दैनिक करिब १ लाख ५० हजार सिलिन्डर बिक्री÷वितरण भइरहेको उनले बताए । सहज बितरणका लागि वाणिज्य विभागको १५–२० जनाको टोली तथा मन्त्री र सम्बन्धित अधिकारीहरू निरन्तर बजार अनुगमनमा खटिएको उनले बताए । यता उपभोक्ताहरुले सहज रुपमा ग्यास पाउन नसकेको गुनासो गरेका छन् ।
उपभोक्ताहरुले निगमको टेकुस्थित बितरण केन्द्रमा समेत सहज रुपमा ग्यास पाउन नसकेको बताएका छन् । निगमले भने नागरिकलाई रित्तो हात फर्किन नदिन बितरणको समय अवधि थप्ने भन्दै थप जनशक्ति तथा नियन्त्रण कक्षको व्यवस्था गरिएको जनाएको छ । निगमले फुल सिलिण्डरको बिक्री सुरु गरेसँगै बजारमा ग्यासको अभाव देखिएको हो ।
प्रकाशित मिति: २३ श्रावण २०८३, शनिबार
प्रतिक्रिया