काठमाडौं । नेकपा (एमाले)का अध्यक्ष केपी शर्मा ओलीले नेपालको जातीय, भाषिक तथा सांस्कृतिक विविधता राष्ट्रिय सौन्दर्यसँगै देशको महत्वपूर्ण शक्ति भएको बताएका छन् ।
विश्व आदिवासी दिवसको अवसरमा आइतबार सामाजिक सञ्जालमार्फत शुभकामना सन्देश जारी गर्दै अध्यक्ष ओलीले नेपालको विविधताबीचको आपसी मेलमिलाप, सहअस्तित्व र एकताले राष्ट्रिय सामर्थ्यलाई थप मजबुत बनाउने बताएका हुन् ।
ओलीले नेपालको जातीय, भाषिक र सांस्कृतिक विविधतालाई सम्मान गर्दै सबै समुदायबीच आपसी सद्भाव र एकताको भावना बलियो बनाउनुपर्नेमा जोड दिएका छन् । उनले भनेका छन्, ‘नेपालको जातीय, भाषिक र सांस्कृतिक विविधता हाम्रो राष्ट्रिय सौन्दर्य र शक्ति हो। हामीबीचको आपसी मेलमिलाप, सहअस्तित्व र एकताले हाम्रो राष्ट्रिय सामर्थ्य बढाउनेछ।’
उनले नेपालको संविधानले सबै समुदायका लागि समान अधिकार तथा समावेशी र सहभागितामूलक प्रतिनिधित्वको सुनिश्चितता गरेको उल्लेख गरेका छन् । संविधानले प्रदान गरेका अधिकारको प्रभावकारी कार्यान्वयनसँगै आदिवासी समुदायको हक, अधिकार, संस्कृति र पहिचानको संरक्षण तथा सम्मान गर्नुपर्ने उनको भनाइ छ ।
विश्व आदिवासी दिवसका अवसरमा ओलीले स्वदेश तथा विदेशमा रहेका सम्पूर्ण आदिवासी समुदायमा शुभकामना व्यक्त गरेका छन् । उनले आदिवासी समुदायको मौलिक संस्कृति, परम्परा, पहिचान र अधिकारको संरक्षण गर्दै उनीहरूको योगदानलाई सम्मान गर्नुपर्ने बताएका छन् ।
ओलीले समावेशी लोकतान्त्रिक व्यवस्थाको सुदृढीकरण र राष्ट्रिय स्वाधीनताको रक्षा गर्दै समृद्ध नेपाल निर्माण गर्ने साझा लक्ष्यमा सबै नेपाली एकताबद्ध हुनुपर्नेमा जोड दिएका छन् । विविधतालाई विभाजनको आधार नभई राष्ट्रिय एकता र समृद्धिको शक्तिका रूपमा अघि बढाउनुपर्ने उनको सन्देश छ ।
प्रकाशित मिति: २४ श्रावण २०८३, आइतबार
प्रतिक्रिया