बुटवल । तीन दिनदेखि सम्पर्कविहीन रहेका कपिलवस्तु नगरपालिकाका पूर्वमेयर तथा नेपाली कांग्रेसका नेता किरण सिंह मृत अवस्थामा फेला परेका छन् ।
६५ वर्षीय सिंहको शव आइतबार कपिलवस्तुको गोरुसिङ्गे जंगलमा फेला परेको जिल्ला प्रहरी कार्यालय कपिलवस्तुले जनाएको छ । कपिलवस्तुका प्रहरी प्रमुख एसपी मनोहर भट्टका अनुसार जंगल क्षेत्रमा खोजी गर्ने क्रममा सिंहको शव फेला परेको हो ।
सिंह शुक्रबार दिउँसो करिब २ बजे कपिलवस्तु नगरपालिका–३ स्थित आफ्नै घरबाट बाहिरिएका थिए । त्यसपछि उनी सम्पर्कविहीन भएका थिए ।
उनले प्रयोग गर्ने लु प्र ०१०१३ प ७९७० नम्बरको मोटरसाइकल पूर्व–पश्चिम राजमार्गबाट करिब आठ किलोमिटरभित्र गोरुसिङ्गे जंगलमा रोकिराखेको अवस्थामा शुक्रबार नै फेला परेको थियो ।
सिंहको खोजीका लागि प्रहरीले तालिमप्राप्त कुकुरसहितको टोली परिचालन गरेको थियो । गौतमबुद्ध विमानस्थलबाट समेत तालिमप्राप्त कुकुर ल्याएर खोजी अभियान सञ्चालन गरिएको प्रहरीले जनाएको छ ।
सिंह कपिलवस्तु नगरपालिकाका पूर्वमेयरसमेत हुन् । उनको मृत्युको कारणबारे प्रहरीले अनुसन्धान अघि बढाएको जनाएको छ ।
प्रकाशित मिति: २४ श्रावण २०८३, आइतबार
प्रतिक्रिया