काठमाडौं । ३२औँ विश्व आदिवासी दिवस आज नेपालमा पनि विभिन्न कार्यक्रम गरी मनाइँदैछ। नेपालको हिमाल, पहाड, तराई तथा भित्री मधेसका विभिन्न भूगोलमा बसोबास गर्ने आदिवासी जनजाति समुदायले आफ्नो भाषा, संस्कृति, परम्परा, कला, जीवनशैली र मौलिक पहिचान संरक्षण गर्दै दिवस मनाइरहेका छन्।
हिमाली क्षेत्रमा शेर्पा, भोटे, थकालीलगायत समुदायको आफ्नै मौलिक संस्कृति र परम्परा छ। पहाडी भूगोलमा गुरुङ, मगर, तामाङ, राई, लिम्बू, सुनुवार, नेवारलगायत आदिवासी जनजाति समुदायको बसोबास रहेको छ। त्यस्तै, तराई तथा भित्री मधेसमा थारू, राजवंशी, धिमाल, माझी, बोटे, दनुवारलगायत समुदायले आफ्नो मौलिक भाषा, संस्कार र सांस्कृतिक परम्परालाई निरन्तरता दिँदै आएका छन्।
नेपालका आदिवासी जनजाति समुदायले प्राकृतिक स्रोत, भूमि, भाषा तथा सांस्कृतिक सम्पदासँग गहिरो सम्बन्ध राख्दै आएका छन्। पछिल्लो समय भाषा तथा संस्कृति संरक्षण, भूमि अधिकार, समान सहभागिता र राज्यका सबै तहमा प्रतिनिधित्वको विषयलाई उनीहरूले प्राथमिकताका साथ उठाउँदै आएका छन्।
विश्व आदिवासी दिवसले आदिवासी जनजातिको अधिकार, पहिचान, भाषा, संस्कृति र परम्पराको संरक्षण तथा सम्मानका लागि विश्वव्यापी ऐक्यबद्धता व्यक्त गर्ने अवसर प्रदान गर्दै आएको छ। नेपालमा पनि विविधताभित्रको एकता र बहुसांस्कृतिक पहिचानलाई सम्मान गर्दै आदिवासी जनजातिको अधिकार सुनिश्चित गर्नुपर्ने आवाज यस अवसरमा उठाइएको छ।
तस्बिरहरु- नेपाल फोटो लाइब्रेरी
प्रकाशित मिति: २४ श्रावण २०८३, आइतबार
प्रतिक्रिया