काठमाडौं । कोसोभोको संसद्मा शनिबार नाटकीय घटना भएको छ। विपक्षी दलकी सांसदले कार्यवाहक प्रधानमन्त्री अल्बिन कुर्तीमाथि अण्डा प्रहार गरेपछि संसद्को बैठक नै स्थगित गरिएको छ।
विपक्षी गठबन्धन ‘अलायन्स फर द फ्युचर अफ कोसोभो’ (एएके)की सांसद टाइम काद्रिजाज संसद्को अगाडिको पंक्तिमा रहेका प्रधानमन्त्री कुर्ती नजिक पुगेर लगातार अण्डा प्रहार गरेकी थिइन्।
अण्डा प्रहार गरेपछि उनले कुर्तीलाई लक्षित गर्दै ‘तपाईंलाई लाज लाग्नुपर्छ’ भन्दै आक्रोश व्यक्त गरेकी थिइन्। त्यसपछि सुरक्षाकर्मी तथा अन्य सांसदले उनलाई रोकेका थिए भने कुर्तीलाई सुरक्षाकर्मीले घेरामा राखेका थिए।
घटनापछि संसद्को बैठक तत्काल स्थगित गरिएको थियो। सभामुखले संसद्को प्रत्यक्ष टेलिभिजन प्रसारणसमेत बन्द गर्न निर्देशन दिएका थिए।
काद्रिजाजले पछि घटनाको भिडियो सामाजिक सञ्जालमार्फत सार्वजनिक गरेकी छन्। यता, आफूमाथि अण्डा प्रहार भएको घटनाप्रति प्रधानमन्त्री कुर्तीले भने आक्रामक प्रतिक्रिया दिएका छैनन्। उनले राजनीतिक संवाद कायम राख्न आवश्यक परे अण्डा प्रहारसमेत सहन तयार रहेको बताएका छन्।
सरकार गठनमा बहुमत जुटाउन सकस
यो घटना कुर्ती नेतृत्वको पार्टी ‘भेटेभेन्दोस्जे’ नयाँ सरकार गठनका लागि विपक्षी दलहरूसँग सहमति जुटाउन संघर्ष गरिरहेका बेला भएको हो।
जुन ७ मा सम्पन्न आमनिर्वाचनमा भेटेभेन्दोस्जेले १२० सदस्यीय संसद्मा ५३ सिट जित्दै सबैभन्दा ठूलो राजनीतिक शक्ति बनेको थियो। तर सरकार गठनका लागि आवश्यक बहुमत भने उससँग छैन।
बहुमत जुटाउन विपक्षी दलको समर्थन आवश्यक भएपछि कुर्तीले विभिन्न राजनीतिक दलसँग वार्ता गरिरहेका छन्। १८ सिट जितेको ‘डेमोक्रेटिक लिग अफ कोसोभो’ (एलडीके)लाई सम्भावित प्रमुख गठबन्धन साझेदारका रूपमा हेरिएको छ।
तर कुर्ती र एलडीकेका नेता लुमिर अब्दिक्सिकुबीच पटक–पटक वार्ता भए पनि अहिलेसम्म सहमति जुट्न सकेको छैन। अर्को प्रमुख विपक्षी दल ‘कोसोभो डेमोक्रेटिक पार्टी’ (पीडीके)सँग २२ सिट छन्।
सभामुख चयनसमेत अन्योलमा
शनिबारको संसद् बैठक प्रधानमन्त्री कुर्तीले सभामुखका लागि उम्मेदवार घोषणा गर्ने अपेक्षासहित बोलाइएको थियो। तर उनले राष्ट्रपतिको निर्वाचनबारे थप राजनीतिक वार्ताका लागि समय आवश्यक रहेको बताएका छन्।
राष्ट्रपति चयनका विषयमा दलहरूबीच सहमति बन्न नसकेपछि कुर्तीले तत्काल निर्णय गर्नुको सट्टा थप छलफल आवश्यक रहेको बताएका हुन्।
कोसोभो पछिल्लो समय लामो राजनीतिक अस्थिरताबाट गुज्रिरहेको छ। दुई वर्षभन्दा कम अवधिमै तीन पटक आमनिर्वाचन भइसकेको छ। संसद्मा राजनीतिक सहमति बन्न नसक्दा पटक–पटक राजनीतिक गतिरोध उत्पन्न हुँदै आएको छ।
जुन ७ को निर्वाचन पनि निर्धारित समयभित्र राष्ट्रपतिको निर्वाचन गर्न सांसदहरू असफल भएपछि गराइएको थियो।
कोसोभोको संविधानअनुसार अन्तिम निर्वाचन परिणाम पुष्टि भएको ३० दिनभित्र संसद् औपचारिक रूपमा गठन गरिसक्नुपर्ने व्यवस्था छ। तर उक्त समयसीमा शुक्रबार नै समाप्त भइसकेको छ।
समयसीमा समाप्त भए पनि कुर्ती तत्काल अर्को निर्वाचनमा जाने जोखिम लिनुभन्दा राजनीतिक दलहरूबीच थप वार्ता गर्ने पक्षमा देखिएका छन्। विपक्षी सांसदहरूले भने उनको कदमविरुद्ध कानुनी प्रक्रिया अघि बढाउने चेतावनी दिएका छन्।
यद्यपि, संसद् गठनको संवैधानिक समयसीमा उल्लंघन भएपछि त्यसको कानुनी परिणाम के हुने भन्ने विषयमा संविधान स्पष्ट नरहेकाले अन्योल कायमै छ।
यसबीच राष्ट्रपतिको निर्वाचनका लागि छुट्टै दुई महिनाको समयसीमा रहेको छ। उक्त अवधिभित्र राष्ट्रपति चयन हुन नसके स्वतः नयाँ संसदीय निर्वाचन हुने संवैधानिक व्यवस्था छ। यसले कोसोभो फेरि अर्को आमनिर्वाचनतर्फ धकेलिन सक्ने सम्भावना बढाएको छ।
प्रकाशित मिति: २४ श्रावण २०८३, आइतबार
प्रतिक्रिया