काठमाडौं । भारतीय प्रधानसेनापति जनरल धिरज सेठ नेपाल भ्रमणका क्रममा आइतबार काठमाडौं आइपुगेका छन् । एयर इन्डियाको विमानमार्फत उनी अपराह्न ४ः१५ बजे त्रिभुवन अन्तर्राष्ट्रिय विमानस्थलमा अवतरण गरेका हुन् ।
नेपाल भ्रमणका क्रममा प्रधानसेनापति सेठले प्रधानमन्त्री एवं रक्षामन्त्री बालेन्द्र शाहसँग भेटवार्ता गर्ने कार्यक्रम छ । उनले नेपाली सेनाका प्रधानसेनापति अशोकराज सिग्देलसँग पनि भेटवार्ता गर्नेछन् ।
गत जुन ३० मा भारतीय स्थल सेनाको प्रधानसेनापतिको जिम्मेवारी सम्हालेका सेठलाई नेपाल सरकारले नेपाली सेनाको मानार्थ महारथीको दर्जा प्रदान गर्ने भएको छ ।
नेपाली सेनाका प्रवक्ता सहायक रथी राजाराम बस्नेतका अनुसार सोमबार राष्ट्रपति भवन शीतल निवासमा आयोजित विशेष समारोहमा राष्ट्रपति रामचन्द्र पौडेलले भारतीय प्रधानसेनापति सेठलाई नेपाली सेनाको मानार्थ महारथीको दर्ज्यानी चिन्ह प्रदान गर्नेछन् ।
मानार्थ महारथीको दर्जा ग्रहण गरेपछि प्रधानसेनापति सेठ सोमबार नै नेपाली सेनाको मुख्यालय जङ्गी अड्डामा आयोजित औपचारिक कार्यक्रममा सहभागी हुने कार्यक्रम रहेको छ ।
नेपाल र भारतबीच कायम रहेको सैन्य सम्बन्ध तथा पारस्परिक सहयोगको परम्पराअनुसार दुवै देशका प्रधानसेनापतिलाई एकअर्काको सेनाको मानार्थ महारथीको दर्जा प्रदान गर्ने प्रचलन रहँदै आएको छ ।
तस्बिरहरु नेपाल फोटो लाइब्रेरी
प्रकाशित मिति: ३१ श्रावण २०८३, आइतबार
प्रतिक्रिया