काठमाडौं। नेपाल–चीन सीमा क्षेत्रमा आएको विनाशकारी बाढीबाट ज्यान गुमाएकाहरूको सम्मानमा स्पेनिस फुटबल क्लब एफसी बार्सिलोनाले मौनधारण गरेको छ।
स्पेनमा आयोजित आफ्नो खेलअघि बार्सिलोनाका खेलाडी तथा पदाधिकारीहरूले बाढीमा परी ज्यान गुमाएका नेपालीसहित प्रभावितहरूप्रति सम्मान व्यक्त गर्दै एक मिनेट मौनधारण गरेका हुन्।
नेपालको उत्तरी क्षेत्रमा आएको भीषण बाढीले ठूलो जनधनको क्षति पुर्याएपछि अन्तर्राष्ट्रिय स्तरमा समेत त्यसप्रति चासो र ऐक्यबद्धता व्यक्त हुन थालेको छ।
बार्सिलोनाले मौनधारणमार्फत प्राकृतिक विपत्तिमा ज्यान गुमाउनेहरूप्रति श्रद्धाञ्जली व्यक्त गर्नुका साथै विपद्बाट प्रभावित परिवार तथा समुदायप्रति सहानुभूति प्रकट गरेको हो।
नेपाल–चीन सीमा क्षेत्रमा आएको बाढीबाट सडक, पुल, घर तथा अन्य भौतिक संरचनामा समेत ठूलो क्षति पुगेको छ। बाढीपछि प्रभावित क्षेत्रमा उद्धार, बेपत्ताको खोजी तथा राहत वितरण कार्य जारी छ।
विश्वकै चर्चित फुटबल क्लबमध्ये एक बार्सिलोनाले नेपालको विपत्तिमा पीडितप्रति सम्मान व्यक्त गर्नुले प्राकृतिक विपत्तिको पीडाप्रति अन्तर्राष्ट्रिय ऐक्यबद्धताको सन्देश दिएको छ।
प्रकाशित मिति: १२ भाद्र २०८३, शुक्रबार
प्रतिक्रिया