काठमाडौं। अमेरिकाको प्रसिद्ध ग्रान्ड क्यानियन राष्ट्रिय निकुञ्जमा अचानक आएको भीषण बाढीले ठूलो क्षति पुर्याएको छ। बाढीमा परी एक जनाको मृत्यु भएको छ भने करिब १५ जना अझै बेपत्ता रहेको आशंका गरिएको छ।
कोलोराडो नदीको ‘क्रिस्टल र्यापिड्स’ नजिकै बाढीमा परी मृत्यु भएका ४६ वर्षीय पुरुषको शव फेला परेको निकुञ्ज प्रशासनले जनाएको छ। प्रारम्भिक विवरणमा बेपत्ता वा सम्पर्कविहीन हुनेको संख्या २० जनासम्म अनुमान गरिएको थियो।
भारी वर्षापछि आएको बाढीले पार्कका झोलुङ्गे पुल तथा पदमार्गहरू बगाउनुका साथै दर्जनौँ हाइकर र क्याम्परलाई विस्थापित गरेको छ। उद्धार टोलीले हालसम्म कम्तीमा ६२ जनालाई सुरक्षित स्थानमा पुर्याइसकेको छ।
बाढीको भयावहता त्यसबेला झन् स्पष्ट भयो, जब एक दम्पतीले आफूहरू केही मिनेटअघि मात्रै तरेका पुलहरू बाढीले बगाएको देखेका थिए।
बाढीले निकुञ्जको मुख्य खानेपानी पाइपलाइनसमेत क्षतिग्रस्त बनाएपछि ‘साउथ रिम’ क्षेत्रमा खानेपानी र अग्नि नियन्त्रणका लागि प्रयोग हुने पानीको आपूर्ति प्रभावित भएको छ।
बेपत्ता भएकाहरू दुर्गम भित्री क्यानियनका पदमार्ग वा ‘नोर्थ काइबाब/फ्यान्टम र्यान्च’ आसपास रहेको हुनसक्ने अनुमान गरिएको छ। उद्धार टोलीले हेलिकप्टरसहित विभिन्न क्षेत्रमा खोजी जारी राखे पनि पछिल्लो खोजीमा बेपत्ता व्यक्तिहरू फेला पर्न सकेका छैनन्।
ग्रान्ड क्यानियन प्रशासन, राष्ट्रिय निकुञ्ज सेवा तथा एरिजोना सार्वजनिक सुरक्षा विभागको समन्वयमा उद्धार र खोजी कार्य जारी रहेको छ।
प्रकाशित मिति: १५ भाद्र २०८३, सोमबार
प्रतिक्रिया