काठमाडौं । चीनको तिब्बततर्फबाट रसुवाको भोटेकोशी नदीमा आएको विनाशकारी बाढीबाट भएको मानवीय क्षतिको संख्या थप बढेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार मंगलबार बिहान ९ बजेसम्म विभिन्न जिल्लाबाट ९८७ जनाको शव फेला परेको छ।
प्राधिकरणका अनुसार रसुवामा २७, नुवाकोटमा ९५, धादिङमा ५५, गोरखामा ६५, नवलपरासी (बर्दघाट सुस्ता पूर्व)मा २१६, नवलपरासी (बर्दघाट सुस्ता पश्चिम)मा १७०, तनहुँमा ३८ र चितवनमा ३२१ शव तथा विभिन्न मानव अंग फेला परेका छन्।
बाढी आएको पाँच दिन बितिसक्दा पनि ३ हजार ९१६ जना अझै सम्पर्कविहीन रहेको प्राधिकरणले जनाएको छ। सम्पर्कविहीन हुनेमा नेपाल प्रहरी, सशस्त्र प्रहरी, नेपाली सेना, विभिन्न जलविद्युत् आयोजना तथा भन्सार कार्यालयमा कार्यरत कर्मचारीसमेत छन्।
सम्पर्कविहीनमध्ये ५८३ जना विदेशी नागरिक रहेका छन्। त्यस्तै, विदेशी पर्यटकसँगै भ्रमणमा गएका १६४ जना नेपाली नागरिक समेत अझै सम्पर्कमा नआएको प्राधिकरणले जनाएको छ।
यसबीच, बाढी प्रभावित विभिन्न क्षेत्रबाट हालसम्म ११ हजार ८१४ जनाको उद्धार गरिएको छ। बाढीमा परी घाइते हुनेको संख्या २७९ पुगेको छ। तीमध्ये १६८ जना उपचारपछि अस्पतालबाट डिस्चार्ज भइसकेका छन्।
खोज तथा उद्धार एवं राहत वितरणका लागि २१ हजारभन्दा बढी सुरक्षाकर्मी परिचालन गरिएको छ। नेपाली सेना, नेपाल प्रहरी र सशस्त्र प्रहरीसहितका सुरक्षा निकायले प्रभावित क्षेत्रमा खोजी तथा उद्धार अभियानलाई निरन्तरता दिइरहेका छन्।
भदौ १० गते बिहान आएको भोटेकोशी बाढीले रसुवा, नुवाकोटलगायतका जिल्लामा ठूलो जनधनको क्षति पुर्याएको छ। बाढीपछि बेपत्ता नागरिकको खोजी तथा प्रभावितको उद्धार र राहतका लागि सुरक्षा निकाय तथा अन्य सम्बन्धित निकाय परिचालित छन्।
प्रकाशित मिति: १६ भाद्र २०८३, मंगलबार
प्रतिक्रिया