काठमाडौं । पूर्वाधार विकासमन्त्री सुनिल लम्सालले भोटेकोशी बाढीबाट प्रभावित नागरिकका लागि नयाँ शहर निर्माण गर्ने योजना अघि बढाइने बताएका छन् ।
सोमबार प्रतिनिधिसभाअन्तर्गतको विकास समितिको बैठकमा बोल्दै मन्त्री लम्सालले बाढीबाट क्षति भएको स्थानमा पुनः बस्ती बसाल्न सम्भव नरहेकाले सुरक्षित स्थानमा नयाँ शहर विकास गर्ने योजना रहेको जानकारी दिए ।
उनका अनुसार नयाँ शहरमा उद्योग, अस्पताल, विद्यालयलगायत आवश्यक पूर्वाधार तथा सेवा–सुविधा समेटिनेछन् । त्यसका लागि आवश्यक जग्गा खरिद गरेर योजनाबद्ध रूपमा बस्ती विकास गरिने उनले बताए ।
‘अब हामी नयाँ शहर बनाउने अवधारणामा जानेछौँ । अहिले भूकम्पभन्दा फरक तरिकाले जानुपर्नेछ । जुन स्थानमा क्षति भएको हो, त्यही स्थानमा फर्काउने योजना छैन,’ मन्त्री लम्सालले भने ।
उनले भोटेकोशी बाढीपछिको पुनर्निर्माणका लागि छुट्टै नयाँ प्राधिकरण गठन नगर्ने पनि स्पष्ट पारे ।
बाढीपछिको पुनर्निर्माण, पुनःस्थापना तथा विपद् व्यवस्थापनका कामलाई प्रभावकारी बनाउन राष्ट्रिय विपद् जोखिम न्यूनीकरण तथा व्यवस्थापन प्राधिकरणलाई थप शक्तिशाली बनाइने उनको भनाइ थियो ।
सरकारले बाढी प्रभावित क्षेत्रको जोखिमलाई ध्यानमा राख्दै सुरक्षित स्थानमा योजनाबद्ध बस्ती विकास गर्ने र आवश्यक पूर्वाधारसहित नयाँ शहर निर्माणको अवधारणा अघि बढाउने मन्त्री लम्सालले बताए ।
प्रकाशित मिति: ५ आश्विन २०८३, सोमबार
प्रतिक्रिया