काठमाडौं । नेपाली कम्युनिस्ट पार्टीले सरकारविरुद्ध आन्दोलन अघि बढाउने तयारी थालेको छ ।
मंगलबार पार्टी मुख्यालयमा बसेको कार्यसंयोजन समितिको बैठकमा सरकारका गतिविधिविरुद्ध आन्दोलनमा जाने विषयमा छलफल भएको पार्टी प्रवक्ता प्रकाश ज्वालाले जानकारी दिए ।
ज्वालाका अनुसार बैठकले महँगी, भ्रष्टाचार र सुकुम्बासीका समस्यालगायत विषयलाई उठाउँदै आन्दोलन अघि बढाउने निष्कर्ष निकालेको छ । राष्ट्रिय स्वाधीनता र राष्ट्रियताको पक्षमा समेत आन्दोलन केन्द्रित गर्ने निर्णय भएको उनले बताए ।
‘सरकारले जनविरोधी क्रियाकलाप गरिरहेको छ,’ ज्वालाले भने, ‘महँगी, भ्रष्टाचार, सुकुम्बासीको बिचल्लीसहित राष्ट्रिय स्वाधीनता र राष्ट्रियताको पक्षमा आन्दोलन अगाडि बढाउने निष्कर्ष बैठकले निकालेको छ ।’
आन्दोलनको स्वरूप र कार्यक्रमबारे भने आगामी सचिवालय बैठकले विस्तृत कार्ययोजना तय गर्ने ज्वालाले बताए ।
प्रकाशित मिति: ६ आश्विन २०८३, मंगलबार
प्रतिक्रिया