काठमाडौं । नेपाली कांग्रेसले १८ वर्ष उमेर पूरा नगरेका व्यक्तिलाई पार्टी सदस्य नबनाउन निर्देशन दिएको छ ।
केन्द्रीय निर्वाचन समितिका सदस्यसचिव राजु कटुवालले विज्ञप्ति जारी गर्दै कांग्रेसको विधानअनुसार पार्टी सदस्य बन्न १८ वर्ष उमेर पूरा भएको हुनुपर्ने स्पष्ट पारेका छन् ।
यसैबीच, इलामको माइजोगमाई गाउँपालिका–५ को वडा अधिवेशनबाट क्षेत्रीय प्रतिनिधि चुनिएका १७ वर्षीय सुजल चापागाईँको जिम्मेवारी स्थगन गरिएको छ । १५औँ महाधिवेशनका क्रममा उनी क्षेत्रीय प्रतिनिधि निर्वाचित भए पनि नागरिकताको विवरणअनुसार १८ वर्ष पूरा हुन केही महिना बाँकी रहेको पाइएपछि निर्वाचन समितिले उनको जिम्मेवारी स्थगन गरेको हो ।
समितिका अनुसार आगामी माघ १८ गते चापागाईँ १८ वर्ष पूरा हुनेछन् । त्यसपछि उनले चाहेमा पार्टी सदस्यता कायम गर्न सक्ने स्पष्ट गरिएको छ ।
कांग्रेसले अन्य जिल्लाका वडा तहका निर्वाचनमा पनि १८ वर्ष नपुगेका व्यक्ति निर्वाचित भएको पाइए त्यस्ता निर्वाचनको निर्णय कार्यान्वयन नगर्न सम्बन्धित निकायलाई निर्देशन दिएको छ ।
प्रकाशित मिति: ७ आश्विन २०८३, बुधबार
प्रतिक्रिया