सुनसरी । तीन दिनदेखिको वर्षाका कारण सुनसरी र सप्तरीको सीमाना हुँदै बग्ने सप्तकोशी नदीमा जलसतह जोखिमपूर्ण अवस्थामा पुगेको छ ।
कोशी ब्यारेजमा जलसतह शनिबार दिउँसो ३ बजे २ लाख ९० हजार ३७० क्युसेक पुगेको सशस्त्र प्रहरी बल, सीमा सुरक्षा गुल्म भाण्टाबारीका प्रहरी नायव उपरीक्षक फुर्गेली शेर्पाले जानकारी दिए । शनिबार बिहान ३ लाख १० हजार १ सय क्युसेकसम्म पुगेको थियो । पानीको बहाव २ लाख ५० हजार क्युसेकभन्दा बढी हुनुलाई जोखिमपूर्ण मानिन्छ ।
पछिल्लो समय ब्यारेजका ५६ मध्ये ३८ वटा ढोको खोलिएको उनले बताए । उनकाअनुसार शुक्रबार राति ३ लाख १३ हजार ५९५ क्युसेकसम्म पुगेको जलसतह अहिले घट्ने क्रममा छ । शुक्रबार राति ब्यारेजका ४३ वटा ढोका खोलिएको थियो । यही क्रमले घट्दै जाने हो भने सप्तकोशीको त्रास पनि कम हुँदै जाने उनको भनाइ छ ।
कोशीमा जोखिम कायमै रहेका बेला बाढीबाट लाभ उठाउनेको संख्या पनि कम छैन । जब कोशीमा बाढी आउँछ, त्यससँगै बगेर आउने काठ–दाउरा संकलन गर्न स्थानीयको भीड लाग्छ ।
बाढीको समयमा यहाँ दैनिक ५० जनाभन्दा बढी स्थानीयले दाउरा संकलन गरेर आम्दानी गर्ने गरेका छन् । गुणस्तर हेरेर एक ट्रयाक्टर दाउरा तथा काठको मूल्य १० देखि २० हजार रूपैयाँसम्म पर्ने स्थानीय बताउँछन् ।
बाढीको समयमा नदीमा दाउरा निकाल्दा जोखिम हुने भन्दै सुनसरी र सप्तरीतर्फ प्रहरीले कडाइ गरेको छ । तर, प्रहरीको सूचनाको बेवास्ता गर्दै स्थानीयले दाउरा निकाल्ने गरेका छन् ।
तस्बिर : नवीन गड्तौला/नेपाल फोटो लाइब्रेरी
प्रकाशित मिति: १० आश्विन २०८३, शनिबार
प्रतिक्रिया