काठमाडौं । नेपाली कांग्रेसका पूर्वसभापति शेरबहादुर देउवा पार्टीको १५औँ महाधिवेशन उद्घाटन समारोहमा सहभागी नहुने भएका छन्।
देउवा सहभागी नहुने उनका स्वकीय सचिव भानु देउवाले जानकारी दिएका छन्। कांग्रेसले आइतबार काठमाडौंको खुलामञ्चमा आयोजना गरेको उद्घाटन समारोहमा प्रमुख अतिथिका रूपमा सहभागी हुन देउवालाई निमन्त्रणा पठाएको थियो।
तर, निमन्त्रणा दिने शैलीप्रति देउवा पक्ष असन्तुष्ट देखिएको छ। भानुका अनुसार शनिबार राति कांग्रेस सहमहामन्त्री योगेन्द्र चौधरीसहितको टोली देउवा बस्दै आएको चुनदेवीस्थित निवास पुगेको थियो। त्यतिबेला घरमा कोही नभएपछि टोलीले निमन्त्रणापत्र बाहिरै छाडेर फर्किएको उनले बताए।
‘निमन्त्रणा दिनु नै थियो भने तीन–चार दिनअगाडि नै आएर दिए हुन्थ्यो। घरमा कोही नभएका बेला आएर निमन्त्रणा छोडेर पनि कहीँ हुन्छ ?’ भानुले भने।
देउवा पक्षले निमन्त्रणा गर्ने प्रक्रियाप्रति असन्तुष्टि जनाएसँगै उनी महाधिवेशन उद्घाटनमा सहभागी नहुने भएका हुन्।
प्रकाशित मिति: १८ आश्विन २०८३, आइतबार
प्रतिक्रिया