काठमाडौं । जनता समाजवादी पार्टी (जसपा) नेपालका चार जना केन्द्रीय नेताले पार्टीबाट सामूहिक राजीनामा दिएका छन्।
पूर्वसङ्घीय सांसदसमेत रहेकी सहिद परिवारकी सदस्य इन्दुकुमारी शर्मा, केन्द्रीय सल्लाहकार सदस्य युसुफ साफी, केन्द्रीय निर्वाचन समिति सदस्य अधिवक्ता घनश्याम शर्मा र युवा नेता पुष्पराज चमनले आइतबार संयुक्त विज्ञप्तिमार्फत पार्टीको साधारण सदस्यसमेत नरहने गरी राजीनामा दिएको घोषणा गरेका हुन्।
उनीहरूले पार्टीको जिम्मेवारी र साधारण सदस्यता दुवैबाट अलग भएको जनाएका छन्।
राजीनामा घोषणा गरेका चारै नेताले अब ‘हुँकार मधेस’ अभियानमा सक्रिय हुने बताएका छन्। उनीहरूले संयुक्त रूपमा जारी गरेको विज्ञप्तिमार्फत आगामी राजनीतिक गतिविधि उक्त अभियानमार्फत अघि बढाउने जानकारी दिएका हुन्।
प्रकाशित मिति: १८ आश्विन २०८३, आइतबार
प्रतिक्रिया