काठमाडौं । शिक्षा क्षेत्रका विभिन्न माग राखेर फ्रान्समा सुरु भएको विद्यार्थी आन्दोलन देशव्यापी रूपमा उग्र बनेको छ। प्रदर्शनका क्रममा हालसम्म ६ हजार ५०० भन्दा बढी पक्राउ परेका छन्।
विद्यार्थीहरूले जीर्ण विद्यालय भवन मर्मत, शिक्षक अभाव पूर्ति, कक्षाकोठामा पर्याप्त पूर्वाधार र शिक्षा बजेट वृद्धि गर्नुपर्ने माग राखेका छन्। सेप्टेम्बर २१ मा क्रेतेलको एक विद्यालयबाट सुरु भएको प्रदर्शन केही समयमै १ हजार २०० भन्दा बढी विद्यालयमा फैलिएको थियो।
अक्टोबर ६ मा आन्दोलन थप उग्र बनेको थियो। सरकारी तथ्याङ्कअनुसार २ लाख ६६ हजार मानिस सडकमा उत्रिएका थिए भने आयोजकले ४ लाख ५० हजारभन्दा बढी सहभागी भएको दाबी गरेका छन्। पेरिस, लियोन, मार्सेई, स्ट्रासबर्ग, रेनेस र टुलुजमा प्रहरी र प्रदर्शनकारीबीच झडप भएको थियो।
शिक्षामन्त्री एडवर्ड जेफ्रेका अनुसार २४ विद्यालयमा आगजनी वा व्यापक तोडफोड भएको छ। घटनामा ७८ कर्मचारी घाइते भएका छन् भने ३० हजार विद्यार्थीको पठनपाठन प्रभावित भएको छ।
प्रदर्शनका क्रममा लेन्समा १५ वर्षीय विद्यार्थी स्टन ग्रेनेड विस्फोटमा घाइते भएका छन्। पेरिसमा १४ वर्षीय विद्यार्थीको मुखमा अश्रुग्यासको गोला लाग्दा उनका कैयौँ दाँत भाँचिएका छन्।
हालसम्म पक्राउ पर्नेमा ८५ प्रतिशत नाबालिग रहेको जनाइएको छ। मंगलबार मात्रै ४८८ जना पक्राउ परेका थिए। गृह मन्त्री लरेन्ट नुनेज र प्रधानमन्त्री सेबास्टियन लेकोर्नुले हिंसा भएका स्थानमा प्रहरीले कडा कारबाही गर्ने बताएका छन्।
सरकारले विद्यार्थीका लागि एक सातासम्म कक्षा स्थगित गर्ने घोषणा गरेको छ। राष्ट्रपति एमानुएल म्याक्रोँले पनि अवस्था नियन्त्रणबारे आपत्कालीन बैठक बोलाएका छन्।
विद्यार्थी युनियनहरूले बिहीबार पुनः देशव्यापी प्रदर्शन गर्ने घोषणा गरेका छन्। शिक्षा बजेटमा गरिएको कटौतीले आन्दोलन थप चर्काएको बताइएको छ। आगामी आमनिर्वाचनको करिब ६ महिनाअघि चर्किएको यो आन्दोलन म्याक्रोँ सरकारका लागि ठूलो राजनीतिक चुनौती बनेको छ।
प्रकाशित मिति: २२ आश्विन २०८३, बिहिबार
प्रतिक्रिया