काठमाडौं । नेकपा (एमाले) संसदीय दलकी उपनेता पद्माकुमारी अर्यालले राष्ट्रिय स्वतन्त्र पार्टी (रास्वपा) का सांसद खगेन्द्र सुनार जोडिएको विवादास्पद अडियो प्रकरणमा संसद्बाटै छानबिन हुनुपर्ने माग गरेकी छन् ।
मंगलबार सिंहदरबारमा सञ्चारकर्मीसँग कुरा गर्दै अर्यालले उक्त प्रकरणप्रति गम्भीर आपत्ति जनाउँदै राजनीतिक दलको आन्तरिक छानबिनमा मात्र सीमित नराखी संसद्ले पनि यसलाई गम्भीरतापूर्वक लिनुपर्ने बताइन् ।
उनले सम्बन्धित व्यक्ति दोषी ठहरिएमा प्रचलित कानुनअनुसार कडा कारबाही गरिनुपर्नेमा जोड दिइन् ।
सार्वजनिक पदमा रहेका व्यक्तिहरूले आफ्नो मर्यादा, आचरण र जवाफदेहितालाई ख्याल गर्दै जनताको सेवकका रूपमा प्रस्तुत हुनुपर्ने अर्यालको भनाइ छ ।
शक्तिको दुरुपयोग गरेर अरूमाथि अवाञ्छित गतिविधि गर्ने छुट कसैलाई पनि नभएको उल्लेख गर्दै उनले सार्वजनिक जिम्मेवारीमा रहेका व्यक्तिहरूले आफ्नो व्यवहार र आचरणमा विशेष सावधानी अपनाउनुपर्ने बताइन् ।
प्रकाशित मिति: २७ आश्विन २०८३, मंगलबार
प्रतिक्रिया