काठमाडौं। जेनजी अभियन्ता मिराज ढुङ्गानाले आफू र केही जेनजी साथीहरूलाई मध्यरातमा गिरफ्तार गर्ने खबर आइरहेको भन्दै सरकारप्रति व्यङ्ग्य गरेका छन्। उनले दसैँपछि मात्रै गिरफ्तारी गर्न आग्रह गर्दै आफूले पनि दसैँपछि वास्तविक वैकल्पिक राजनीतिक शक्तिबारे आफ्नो धारणा सार्वजनिक गर्ने बताएका छन्।
ढुङ्गानाले सोमबार सामाजिक सञ्जाल फेसबुकमा लेख्दै आफूहरूलाई गिरफ्तार गर्ने चर्चा चलिरहेको उल्लेख गरेका हुन्।
‘मलगायत अरू केही जेनजी साथीहरूलाई मध्यरातमा गिरफ्तार गर्ने खबर आइरहेको रहेछ,’ उनले लेखेका छन्, ‘म तेस्रो ध्रुव र यो जनविद्रोहपछि चाहिएको वास्तविक वैकल्पिक शक्तिको वकालत दसैँपछि गर्छु। गिरफ्तार पनि दिनमा, दिउँसो परेर दसैँपछि गर्नुहोला सरकारलाई मेरो आग्रह।’
उनले पछिल्लो समय देशमा रातिको समयमा मात्रै गतिविधि हुने गरेको भन्दै व्यङ्ग्यसमेत गरेका छन्। ‘आजकल देश राति मात्रै बन्दोरहेछ, के गर्नु होला!’ उनले लेखेका छन्।
ढुङ्गानाको अभिव्यक्तिमा आफूलाई गिरफ्तार गर्ने तयारी भइरहेको हल्ला उल्लेख भए पनि त्यसको कारण, सम्भावित आरोप वा सम्बन्धित निकायको आधिकारिक निर्णयबारे विस्तृत जानकारी छैन। गिरफ्तारीको तयारीबारे सरकारी पक्षको प्रतिक्रिया पनि उपलब्ध छैन।
उनले दसैँपछि ‘तेस्रो ध्रुव’ र जनविद्रोहपछि आवश्यक वास्तविक वैकल्पिक शक्तिको वकालत गर्ने बताएका छन्। उनको यो अभिव्यक्तिले आगामी राजनीतिक बहसमा वैकल्पिक शक्तिको अवधारणालाई अघि सार्ने संकेत गरेको छ।
प्रकाशित मिति: ४ कार्तिक २०८३, मंगलबार
प्रतिक्रिया