काठमाडौं। लुम्बिनी विकास कोषकी नवनियुक्त उपाध्यक्ष आनी छोइङ डोल्माले कोषमार्फत धेरै काम गर्न सकिने बताउँदै विगतका बेथिति सार्वजनिक गर्ने बताएकी छन्।
उपाध्यक्ष नियुक्तिपछि आफ्नो सम्पत्ति र नागरिकताबारे उठेका प्रश्न तथा आलोचनाको जवाफ दिँदै उनले आफू सत्कर्ममा विश्वास गर्ने भएकाले यस्ता आलोचनाबाट विचलित नहुने बताइन्। सरकारले गरेको विश्वासप्रति आभार व्यक्त गर्दै उनले पदका लागि आफूले कतै निवेदन नदिएको पनि उल्लेख गरिन्।
आफ्नो सम्पत्ति शुद्धीकरणसम्बन्धी विषय सन् २०१८ को अन्त्यतिर नै कानुनी रूपमा टुंगिएको उनको दाबी छ। विगतमा वैधानिक रूपमा बैंकमार्फत आएको पैसाका विषयमा कर्मचारीतन्त्रबाट दुःख दिइएको स्मरण गर्दै उनले नियमअनुसार समस्या समाधान गरेको बताइन्।
कोषको उपाध्यक्ष पदमा नियुक्त हुन विगतमा ठूलो रकमको चलखेल हुने गरेको आफूले सुनेको उल्लेख गर्दै उनले आर्थिक स्वार्थ र लालचका कारण संस्था बदनाम भएको धारणा राखिन्। नयाँ सरकारले अघि सारेको शुद्धीकरणको कदमबाट विगतमा गलत काम गर्नेहरू अत्तालिएको र पुराना गतिविधि सार्वजनिक हुने डरले विवाद सिर्जना गरिएको उनको आरोप छ।
नागरिकताबारे उठेका प्रश्नमा उनले नेपालमै जन्मिएको ५५ वर्ष भइसकेको उल्लेख गर्दै सम्बन्धित निकायमा बुझेर मात्र टिप्पणी गर्न सञ्चारमाध्यमलाई आग्रह गरिन्। बुद्धको जन्मस्थल लुम्बिनीलाई विश्वभरका बौद्धमार्गीको पवित्र स्थलका रूपमा विकास गर्न आफू प्रतिबद्ध रहेको बताउँदै उनले पाँच वर्षसम्म निर्धक्क भएर काम गर्ने जनाइन्।
यता, ‘लुम्बिनी बचाउ महाअभियान’ ले भने नियुक्तिको विरोध जारी राखेको छ। अभियानका सहसंयोजक राम विकास चौधरीले विगतका सम्झौता र मान्यताविपरीत नियुक्ति गरिएको दाबी गर्दै थप बृहत् विरोधसभा गर्ने तयारी भइरहेको बताएका छन्। अभियानले नियुक्तिले गलत नजिर स्थापित गर्ने र कोषको विकासमा अवरोध पुग्ने जिकिर गरेको छ।
प्रकाशित मिति: ६ कार्तिक २०८३, बिहिबार
प्रतिक्रिया