काठमाडौं । प्रधानमन्त्री वालेन्द्र शाह (बालेन) ले मुलुकको पछिल्लो शान्ति–सुरक्षाको अवस्थाबारे सुरक्षा निकायका प्रमुखहरूसँग जानकारी लिएका छन् ।
बिहीबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा प्रधान सेनापति अशोकराज सिग्देल, नेपाल प्रहरीका महानिरीक्षक डा. मनोजकुमार केसी र सशस्त्र प्रहरी बलका महानिरीक्षक नारायणदत्त पौडेललाई बोलाएर प्रधानमन्त्री शाहले सुरक्षा अवस्थाबारे जानकारी लिएका हुन् ।
छलफलका क्रममा उनले चाडपर्वको समयमा नागरिकको सुरक्षा सुनिश्चित गर्न तथा समग्र शान्ति–सुरक्षा व्यवस्था प्रभावकारी बनाउन आवश्यक तयारी गर्न निर्देशन दिएका छन् ।
प्रधानमन्त्री शाहले नेपाली सेना, नेपाल प्रहरी र सशस्त्र प्रहरी बलबीच समन्वय, सूचना आदानप्रदान र सहकार्यलाई थप प्रभावकारी बनाउन पनि जोड दिएका छन् ।
नागरिकको जीउधनको सुरक्षामा कुनै कमजोरी हुन नदिन, अपराध नियन्त्रणमा शून्य सहनशीलताको नीति अपनाउन र सुरक्षा व्यवस्थालाई चुस्तदुरुस्त राख्न उनले सुरक्षा निकायका प्रमुखहरूलाई निर्देशन दिएका छन् ।
प्रकाशित मिति: १९ कार्तिक २०८३, बिहिबार
प्रतिक्रिया