काठमाडौं । मकवानपुरको भीमफेदी गाउँपालिका–६ चिसापानी गढीमा भएको यात्रुवाहक इभी दुर्घटनामा घाइते भएकामध्ये तीन जनालाई उपचारका लागि हेटौंडा अस्पताल ल्याइएको छ ।
घाइते हुनेमा सर्लाहीको चक्रघट्टा गाउँपालिका–४ सुन्दरपुरटोलका ३३ वर्षीय मुकेश यादव, ५ वर्षीय सक्षम कुमार यादव र ३ वर्षीय सुदन यादव रहेका छन् ।
अस्पताल ल्याइएका मुकेशको टाउको र ढाडमा चोट लागेको छ । उनको अवस्था सामान्य रहेको छ । त्यस्तै, सक्षमको शरीरमा भित्री चोट लागेको र अवस्था सामान्य रहेको जनाइएको छ ।
सुदनको टाउको र मुखमा चोट लागेको छ । उनको अवस्था मध्यम रहेको सशस्त्र प्रहरीका सहप्रवक्ता शैलेन्द्र थापाले जानकारी दिए ।
मधेश प्रदेश ०३–००१ ज ०८८० नम्बरको उक्त इभी काठमाडौँबाट सर्लाहीतर्फ आउँदै गर्दा भीमफेदी–कुलेखानी–काठमाडौँ सडकखण्डबाट करिब ५०० मिटर तल खसेको थियो ।
दुर्घटनामा १० जनाको मृत्यु भएको छ भने ५ जना घाइते भएका छन् ।
प्रकाशित मिति: २६ कार्तिक २०८३, बिहिबार
प्रतिक्रिया