काठमाडौं। विनाशकारी बाढी र पहिरोबाट ठूलो जनधनको क्षति व्यहोरेको नेपाललाई अमेरिकाले सहयोग उपलब्ध गराउने भएको छ।
अमेरिकी राष्ट्रपति डोनाल्ड ट्रम्पले नेपालमा आएको प्राकृतिक विपत्तिप्रति दुःख व्यक्त गर्दै विपद् प्रभावितलाई आवश्यक सहयोग उपलब्ध गराउने प्रतिबद्धता जनाएका हुन्।
नेपालमा पछिल्लो समय आएको भीषण बाढी तथा पहिरोका कारण ठूलो जनधनको क्षति भएको छ। विपद्का कारण सयौँ मानिसको मृत्यु भएको तथा ठूलो संख्यामा मानिस बेपत्ता रहेको जनाइएको छ। बाढी–पहिरोले घर तथा अन्य भौतिक संरचनामा समेत व्यापक क्षति पुर्याएको छ।
राष्ट्रपति ट्रम्पले नेपाल सरकारसँग सम्पर्क गरी आवश्यक सहयोग उपलब्ध गराउने प्रस्ताव गरिएको बताएका छन्। विपद्को विनाशकारी प्रभावबारे उल्लेख गर्दै उनले नेपालमा बलिया र मजबुत भवनसमेत बाढीले बगाएको बताएका छन्।
ट्रम्पले भने, “हामीले नेपालमा फोन गरेर उनीहरूलाई आवश्यक पर्ने जुनसुकै सहयोग उपलब्ध गराउने प्रस्ताव गरेका छौँ।”
यसैबीच, अमेरिकी अधिकारीहरूले विपद् प्रभावित क्षेत्रमा रहेका अमेरिकी नागरिकहरूको अवस्था र सुरक्षाबारे समेत जानकारी लिने प्रयास गरिरहेका छन्।
नेपाल सरकारले बाढी तथा पहिरो प्रभावित क्षेत्रमा उद्धार, राहत तथा पुनःस्थापनाका लागि राष्ट्रिय तथा अन्तर्राष्ट्रिय निकायसँग समन्वय गरिरहेको जनाएको छ।
प्रकाशित मिति: १२ भाद्र २०८३, शुक्रबार
प्रतिक्रिया