बुटवल । बंगालको खाडीमा विकसित अर्नब चक्रवातको प्रभावले लुम्बिनी प्रदेशका आठ जिल्ला बढी प्रभावित हुन सक्ने पूर्वानुमान गरिएको छ।
प्रदेश सरकारका अनुसार लुम्बिनी, रुकुम पूर्व, रोल्पा, प्युठान, अर्घाखाँची, पाल्पा, कपिलवस्तु र नवलपरासी (बर्दघाट सुस्ता पश्चिम) मा भारी वर्षा, चट्याङ र हावाहुरीको जोखिम छ।
आन्तरिक मामिला, कानुन तथा यातायात मन्त्रालयले मौसम पूर्वानुमान महाशाखाको विशेष बुलेटिनलाई उद्धृत गर्दै कात्तिक १३ र १४ गते सतर्कता अपनाउन आग्रह गरेको छ।
सम्भावित वर्षाले नदी तथा खोलामा पानीको बहाव बढ्नुका साथै सडक र हवाई यातायात प्रभावित हुन सक्ने मन्त्रालयले जनाएको छ।
मन्त्रालयले किसानलाई कात्तिक १२ गतेअघि धान काटेर भित्र्याउन, उच्च पहाडी तथा हिमाली क्षेत्रमा यात्रा नगर्न र अत्यावश्यक कामबाहेक यात्रा टार्न अनुरोध गरेको छ।
नदी किनारमा बसोबास गर्ने नागरिकलाई पूर्वसूचनामा ध्यान दिन र सुरक्षित रहन आग्रह गर्दै जोखिमयुक्त क्षेत्रका बासिन्दालाई आवश्यकताअनुसार सुरक्षित स्थानमा सार्ने तयारी गर्न स्थानीय तह तथा सुरक्षा निकायलाई निर्देशन दिइएको छ।
प्रकाशित मिति: १२ कार्तिक २०८३, बुधबार
प्रतिक्रिया