काठमाडौं । राष्ट्रिय स्वतन्त्र पार्टी (रास्वपा) को २० जनाको प्रतिनिधिमण्डल आगामी कात्तिक २९ गतेदेखि चीन भ्रमणमा जाने भएको छ ।
चिनियाँ कम्युनिस्ट पार्टी (सीपीसी) को औपचारिक निमन्त्रणामा रास्वपाका महामन्त्री विपिनकुमार आचार्यको नेतृत्वमा २० सदस्यीय टोली चीन जान लागेको हो ।
भ्रमणका क्रममा दुई पार्टीबीच आपसी अनुभव आदानप्रदानका साथै सुशासन, आर्थिक विकास, सार्वजनिक सेवा प्रवाह, संस्थागत क्षमता अभिवृद्धि तथा जनअपेक्षाअनुरूपको राजनीतिक नेतृत्वलगायत विषयमा छलफल हुने रास्वपाले जनाएको छ ।
रास्वपाका प्रवक्ता जगदीश खरेलद्वारा जारी विज्ञप्तिमा भ्रमणलाई नेपाल र चीनबीच आपसी समझदारी, राजनीतिक संवाद तथा विकास सहकार्य थप सुदृढ र विस्तार गर्ने महत्त्वपूर्ण अवसरका रूपमा लिइएको उल्लेख छ ।
महामन्त्री आचार्यको नेतृत्वमा चीन भ्रमणमा जाने टोलीमा गणेश पराजुली, हरि ढकाल, कविन्द्र बुर्लाकोटी, लिमा अधिकारी आचार्य, समीक्षा बास्कोटा, सागर ढकाल रहेका छन् ।
यस्तै, सुशान्त वैदिक, रीमा विश्वकर्मा, रमेशकुमार सापकोटा, डा. धनञ्जय रेग्मी, गजला शमिम मिकरानी, श्रीराम न्यौपाने, डा. राम लामा, पुनमकुमारी अग्रवाल, डा. आनन्दबहादुर चन्द, डा. सुजाता तामाङ, पुष्पाकुमारी चौधरी, अरविन्द शाह र रत्ना थापा रहेका छन् ।
प्रकाशित मिति: २६ कार्तिक २०८३, बिहिबार
प्रतिक्रिया