उमेदवारले नक्कली जन्मदिनमा भोज गर्न लागेको भन्दै निर्वाचन आयोगमा उजुरी

काठमाडौं । निर्वाचन आयोगले उम्मेदवारलाई आचारसंहिता पालना गराउन पनि चुनौती देखिएको बताएको छ । तराईका जिल्लाबाट यसअघि नै जन्मदिन मनाएका उम्मेदवारले चुनावको बेलामा फेरि जन्मदिन मनाएर भोज खुवाउन लागेको भन्दै आयोगमा उजुरी परेको हो ।

प्रमुख आयुक्त थपलियाले भने, ‘तराईका जिल्लाबाट आयोगमा पाँच÷सात सूचना आएको छ । वैशाख ६ गते बर्थडे मनाएका व्यक्तिले फेरि वैशाख १७ गते बर्थडे भोज गर्न लागे भन्ने सूचना आएको छ । यस अगाडि नै जन्मदिन भए पनि हुँदै नभएको दिनमा भोज खुवाएर जन्मदिन मनाउने हो कि भन्ने चिन्ता थपिएको छ ।’

उम्मेदवारले गर्ने यस्ता काम रोक्न पनि आयोगलाई चुनौती रहेको उनले बताए । शनिबार काठमाडौंको चन्द्रागिरी नगरपालिकाका एक वडाध्यक्षले सारी वितरण गर्न लागेकोमा आयोगले रोकेको प्रमुख आयुक्त थपलियाले बताए ।

यस्तै वैशाख २७ गतेदेखि ३० गतेसम्मको मौन अवधिको समय पनि आयोगका लागि चुनौतीपूर्ण रहेको उनले बताए । उम्मेदवार मनोनयनका क्रममा व्यापक मात्रामा झण्डा र ब्यानर प्रयोग गर्ने चलन रहेकाले यो वर्ष आयोगले कडाई गरेको छ । सम्बन्धित प्रमुख अधिकारीलाई एउटा झण्डा र ब्यानरभन्दा बढी लगेमा थुत्न निर्देशन दिएको थपलियाले बताए ।

प्रकाशित मिति: ११ बैशाख २०७९, आइतबार