काठमाडौं – नेपाल विद्युत प्राधिकरणका पूर्व कार्यकारी निर्देशक कुलमान घिसिङको रिट सर्वोच्च अदालतले दर्ता गरेको छ, तर नवनियुक्त कार्यकारी निर्देशक हितेन्द्रदेव शाक्यको रिट भने अदालतले फिर्ता गरेको छ।
कुलमान घिसिङले आफूलाई पुनः कार्यकारी निर्देशकको पदमा पुनर्स्थापना गर्न माग गर्दै बुधबार सर्वोच्च अदालतमा रिट दायर गरेका थिए। त्यस्तै, हितेन्द्रदेव शाक्यले भने आफूलाई चार वर्षअघि हटाइएको मुद्दामा चाँडो टुंगो लगाइदिन आग्रह गर्दै रिट दायर गरेका थिए।
तर, सर्वोच्च अदालतको प्रशासन शाखाले शाक्यको निवेदन कानुनी प्रक्रिया अपूर्ण रहेको भन्दै फिर्ता गरिदिएको हो। शाक्यले चार वर्षअघि कुलमान घिसिङलाई कार्यकारी निर्देशक नियुक्त गर्ने सरकारको निर्णयविरुद्ध रिट दायर गरेका थिए। उक्त मुद्दाको टुंगो लगाइदिन माग गर्दै दिएको पछिल्लो निवेदन कानुनी रूपमा पूर्ण नठहरिएपछि अदालतले फिर्ता गरेको हो।
यसैबीच, कुलमान घिसिङले मंगलबार नै आफूलाई कार्यकारी निर्देशकबाट हटाउने निर्णय बदर गर्न माग गर्दै सर्वोच्च अदालतमा रिट दायर गरेका थिए, जुन दर्ता गरिएको छ।
प्रकाशित मिति: १३ चैत्र २०८१, बिहिबार
प्रतिक्रिया