हेटौँडा । बागमती प्रदेशका मुख्यमन्त्री इन्द्रबहादुर बानियाँले प्रदेशलाई ‘मानवताको प्रदेश’ घोषणा गर्ने बताएका छन्।
मानव सेवा आश्रमको १३औँ वार्षिक साधारण सभालाई सम्बोधन गर्दै मुख्यमन्त्री बानियाँले प्रदेशका १३ जिल्लामा सडक–आश्रित, बेसहारा र असहाय व्यक्तिको उद्धार तथा संरक्षण सुनिश्चित गर्दै सरकारले ‘मानवताको प्रदेश’ घोषणा गर्ने बताए।
उनले आश्रमको सेवालाई सबै जिल्लामा विस्तार गर्न सरकार पूर्ण रूपमा साझेदार बन्ने र आवश्यक परे भवन तथा संरचना निर्माणमा सहयोग गर्ने प्रतिबद्धता व्यक्त गरे। बानियाँले भने, “एक व्यक्तिले सत्य र मानवताको भावनाबाट निरन्तर काम गर्दा समाज र सरकार दुवैलाई सकारात्मक परिवर्तन ल्याउन सकिन्छ। हामी सरकारमा छौँ, इच्छाशक्ति भए धेरै गर्न सक्छौँ।”
मुख्यमन्त्रीले समाज सुधार र टुटेका मनहरू जोड्नेतर्फ सबैलाई सोच्न आग्रह गर्दै, सङ्घीय सरकारको खाली भवन आश्रमका लागि उपलब्ध गराउने विषयमा प्रधानमन्त्री र सम्बन्धित मन्त्रीसँग पहल गर्ने आश्वासन पनि दिएका छन्।
प्रकाशित मिति: १३ भाद्र २०८२, शुक्रबार
प्रतिक्रिया